Kum 2010-11 leh September 2015 inkarah Nausen thi 3,597; raicheha thi 90 an awm

Kum 2010-11 aṭanga sorkar kum kal meka kum chanve tawp ni, September 31, 2015 thleng khan Mizoramah nausen kum khat hnuai lam thi 3,597 an awm a, raicheha thi nu 90 an awm bawk. Nausen thi tlemna ber chu Mamit district a ni a, raicheha thi tlemna ber chu Serchhip district a ni.

Kum 2010 hnu lamah nausen thi tam ber kum chu kum 2014-15 niin, 822 an thi a, nau chunga nu thi tam ber kum a ni bawk. Kum nga leh a chanve chhunga nausen thi tam berna district chu Aizawl West district niin, nausen 620 an thi a, thi tlemna ber Mamit district-ah nausen 152 an thi. Nu nau chunga thi tam berna Saiha district-ah 16 an thi a, thi tlemna ber Serchhip district-ah pali an thi thung.

Infant Mortality Rate (IMR) san ber kum chu 2014-15 niin, IMR chu 37 a ni a, nau piang 1,000 zelah 37 an thi tihna a ni. IMR hi kum nga chhungin a sang tial tial a, kum 2010-11 ah 27, kum 2011-12 ah 30, kum 2012-13 ah 30, kum 2013-14 ah 35 leh kum 2014-15 ah 37 a ni. Sorkar kum kal mekah kum chanve chhung bikah erawh a tlahniam thung.

Maternal Mortality Rate (MMR) chu kum nga chhungin 100 a tling ngai lo a, kum kal mekah erawh chuan 149-ah a kai chho thung (nu nau hring 1,00,000 zelah 149 an thi tihna). Saiha district-ah phei chuan kum kal mela kum chanve chhunga MMR chu 1,235 a ni.

Sorkar kum kal mek 2015-16 bikah, kum chanve April-September 2015 chhungin nausen kum khat hnuai lam thi 202 an awm a, nu nau chunga thi 11 an awm. Nausên thi zat hi April-September 2014 chhunga thi aiin 124-in a tlem zawk.

April-September 2015 chhung hian Mizoram pumah nau pâi Health sub-centre-a inziak lut 12,003 an ni a; chu'ng zinga 7,401 (62%) chuan TT1 injection lain, 10,365 (86%) chuan TT2 injection an la. Dama nau piang zat chu 9,606 niin, chungte chu mipa 4,876 leh hmeichhia 4,730 an ni a; damdawi-ina nau piang zat chu 8,650 niin, nau piang zat aṭangin 89% a ni.