KHAWTHLIR

Vawiinah Union Minister

Union minister of state (independent charge) for Environment, Forests and Climate Change Prakash Javadekar chuan vawiin hian Aizawl a rawn tlawh dawn a, zaninah Aizawlah riakin, naktukah a haw leh ang. Prakash Javadekar hi vawiin chawhnu dar 3:15-ah Ṭhuampui helipad a rawn thleng ang a, tlai 3:40-ah Bethlehem Vengthlanga Forest Training School-ah JICA hnuaiah training institute din thar tur a hawng ang. Chumi hnuah Governor, Chief Minister leh Mizoram BJP hruaitute a kâwm leh dawn a ni.

CEM-in tlawh

LADC CEM mawhphurhna la mektu H Chhuanawma chuan, nimin khan Mizoram Ṭhalai Kristian Pawl-in February 18-21 chhunga inkhawmpui an eihna tur CYLA playground a tlawh a, sorkar anga tih theih a awm a nih chuan theihtawp an chhuah zel tur thu a sawi.

Lirthei 216 man

Champhai traffic police-te chuan December, 2015 chhung khan lirthei dan bawhchhia 216 an man. Lirthei an mante zingah two wheeler tam berin 68 an man a ni.

Dry day puang

Excise & Narcotics department chuan thuchhuah siamin, Misionary Day, January 11 chu zu zawrh loh ni, dry day atan puan a nih thu a tarlang a; dan bawhchhe lo turin mipuite an chah.

Pastor induction

Naktuk Pathianni hian Mizoram chhung leh pawna Mizoram Presbyterian Kohhrana pastor leh pro.pastor thar leh awmna hmun sawn turte an awmna thar turah lak luhna inkhawm, induction service neih a ni dawn. Kuminah hian induction service hi bial 100 velah tih a ni ang.

Zu endik tum

Mizoramin zu ṭha leh
ṭha lo endikna khawl a neih loh avangin Mizorama zu zawrhte chu Guwahati-ah endik tura thawn tum a nih thu, Health minister Lal Thanzara chuan nimina National Consumer Day a hmanpuinaah a sawi.