Union Forest Minister a lo zin Forest Training Institute a hawng

Minister of state for Environment, Forestry and Climate Change (independent charge) Prakash Javadekar chuan zan khat riakin Mizoram a rawn tlawh a; Inrinni khan Bethlehem Vengthlanga State Forest Training Institute (SFTI) building thar a hawng.

Prakash Javadekar chuan, 'Tichhe loa hmasawnna rahbi thar kai' tih chu a thupui a nih thu sawiin, "India ramin hmasawnna hna chak taka a thawh lai mek hian, min hualtu boruak, thing leh mau leh nungchate tichhe lo zawnga hmalak a ṭul a, state leh central sorkarte an pawimawh," a ti.

Ramngaw venhimna kawnga mipui pawimawhna sawiin Union Minister chuan, "Venghimtu dik tak mipui an tel tam loh chuan a hlawhtling thei lo," a ti a; sorkar laipui chuan a hmalakna kawng tinrengah mipui a dah pawimawh ber tih a sawi.

Prakash Javadekar chuan, Mizoram chu mau tamna ram a nih thu sawiin, "A hman ṭangkai dan leh suma chantir dan kan la thiam tawk loh avangin mi tam tak tana eizawnna ṭha pe theitu mau hi ṭangkai zawka hman dan zawn a ngai. Mizoram leh hmarchhak state dangte chu MoEF & CC thlirna aṭang chuan India ram rohlu a ni," a ti.

Union Minister hian maua eizawngtute bakah private tree planter-te a kâwm nghal bawk.

Environment & Forest mi­nister Lalrinmawia Ralte pawhin thu sawiin, Mizoram chu Indo-Myanmar biodiversity hot spot a nih avangin a pawimawh tih a sawi a, "Hmasawnna hma thar lak avangin kan ramhnuai neih mekte vah darh a ṭul cháng a awm," tiin, thing leh mau, nungchate humhalh chunga hmasawnna hna chak taka thawh dan ngaihtuah a ṭul thu a sawi.

State Forest Training Insti­tute (SFTI) building hawn tâk hi kum 2011-a sak ṭan a ni a, a sakna atan cheng nuai 547.40 ruahman niin, sum hmuh tawh nuai 479.34 aṭangin nuai 458.56 hman a ni tawh. Sum hi MoEF & CC pawmpuinain Japan International Corporation Agency (JICA)
aṭanga hmuh a ni.

Prakash Javadekar hian Inrinni zan khan Governor Lt.Gen. Nirbhay Sharma leh chief minister Lal Thanhawla-te a kâwm a, thil pawimawh hrang hrang a sawipui.

Prakash Javadekar chuan CM Lal Thanhawla chu a chenna banglaah kawmin, thing leh mau, ramngaw ṭha tak la awmte humhalh leh venhim hna ṭha taka thawh a nih theih nan Mizoram sorkar hnuaia field staff hna ruak ṭhahnem tak awmte hi hnawhkhat turin Chief Minister a hrilh.

Union Minister hi MoEF & CC addl. director general Anil Kumar-a'n a rawn ṭawiawm a, nimin khan Mizoram an chhuahsan.