Sorkar laipui, Mizoram leh Tripura sorkar aiawhten Delhi-ah Bru chungchang an sawiho

Tripura-a Bru relief camp-a Mizoram mi Bru awmte chungchang chu January 8, 2016 khan New Delhi-ah sawiho a ni a, thutlukna pawimawh siam theih a ni lo.

Sawihonaah hian Mizoram sorkar aiawhin chief secretary Lalmalsawma leh Delhi-a Mizoram sorkar resident commissioner Ranbhir Singh te an tel.

Thu dawn danin, Tripura-a Mizoram Bru-te chungchang sawihona hi Union Home secretary Rajiv Mehrishi-a hoin a pisaah neih a ni a, Mizoram sorkar aiawh tel mah se, Tripura chief secretary Yashpal Singh a tel theih loh avangin thutlukna pawimawh an siam thei lo.

Sawihonaah hian CS Lalmalsawma chuan Tripura Bru camp-a awmte chu Mizorama hruai let tumin ṭum eng emaw zat hmalak a nih tawh a, chuti chuti chung chuan Mizoramah an let duh lo a, tuna camp-a la awmte chu Mizorama kîr duh lote an nih thu a sawi.

Chief Secretary chuan, Bru-te Mizorama hruai let tura nasa taka sorkar leh pawl hrang hrangte'n ṭan an la chung pawha Mizorama kîr duh lote chu tun hnuah lâk kîr tum leh a nih pawhin, Mizoram sorkarin awmzia a neih a rin tawh loh thu te, tuna camp-a la awmte chuan politics thilah phût neiin, autonomous district council pek an phût thute a sawi bawk.

CS Lalmalsawma thu sawi chungchangah hian Union Home secretary Rajiv Mehrishi chuan a thlâwp zawng emaw, a kalh zawngin sawi a nei lo a; sawihonaa tel ve Union Home joint secretary (NE bialtu) Satyandhar Gargh erawh chuan, Tripura relief camp-a awm Bru-te chuan Mizorama let leh chu an tan a him tâwk lo nia an ngaih avangin an let duh lo niin an sawi tih a sawi thung.

Zawhna chhangin, Lalmalsawma chuan, Tri­pura camp-a Mizoram Bru awmte hming Mizo­ram electoral roll aṭanga paih chungchang chu Elec­tion Commission of India thuneihna a nih avangin an meeting-ah sawi chhuah a ni lo tih a sawi.

Bru-te Mizorama lak let hi Supreme Court chuan kum 2015 khan ngaihtuahin a lo titawp tawh a; January 30, 2015-a Ministry of Home Affairs-in Mizoram leh Tripura aiawhte nena Bru chungchang an sawihonaah, Bru kîr duh lote chu Tripura-a an awm hlen phalsak leh Mizoram electoral roll-a an hming paih turin thutlukna an lo siam tawh a ni.