KHAWTHLIR

Missionary Day

Vawiin, January 11 hi Missionary Day a ni a, sorkar chawlh a ni. Mizorama missionary hmasa Sapupa leh Pu Buanga ten kum 1894-a Sairang thlang, Changsil kàia Mizoram leilung an rah hmasak ber champha, Missionary Day hi Baptist Church of Mizoram-te chuan an tualchhung kohhran
ṭheuhah an lawm dawn a ni.

Model village lawm

East Tuipui bial chhunga model village atana thlan, Khuangthing khua chuan model village
atana thlan an nih January 8 khan an community hall-ah an lawm a, bialtu MLA T Sangkunga'n a hman pui. Khuangthing khua hi Khawbung RD Block chhunga awm a ni a, Myanmar leh India inrinaah a awm.

Hrem thuai phût

Republic Veng Joint Action Committee chuan thuchhuah siamin, January 9, 2015-a an venga Sangliansiama te chhungkuaa mi panga thattua puh, Laltlan-chhuaha, Republic Veng chu a rang thei ang ber leh a na thei ang bera hrem turin thuneitute an ngen tih an puang.

Police-ah 60 tling

Mizoram police unarmed branch-a thawk tur constable, ft. 6 tling chin lakna tur interview result chu January 9, 2016 khan tihchhuah a ni a, mi 60 an tling. DIG (Training) C Laldina hnen aṭanga thu dawn danin, interview turin mi 85 koh an ni.

Thiam loh chang

Kum 2012-a 'Khawnglung Rûn' tih film, a siamtute thu loa mipui hmuh theia tipût rutute chu Lunglei District Court-in thiam loh a chantir. Thu dawn danin, film leak out chungchang­ah hian a siamtu C Lalhmangaiha, Leitlang Pictures chuan November 11, 2012-ah money suit a thehlut a; Court chuan tun hnai khan thutlukna siamin, film tipût rutu mi palite chu Rs. 50,000 ṭheuh chawi turin a ti.

In sak sak

Kolasib Diakkawna Salvation Church chuan Inrinni khan an huam chhunga chhungkaw pakhat chenna in nei lo an sak sak. In an sak sakte chhungkua hi ramhnuai thlama cheng ṭhin niin, in sakna atan hian Khuangtuahthangi chuan an inhmun a thawh a ni.