MYC-in ṭhalai 3,640 a tir chhuak tawh Training kan buatsaih zel dawn - T Sangkunga

Mizoram Youth Commission (MYC) chairman T Sangkunga chuan, MYC chairman a nih hnuah state páwna thiam thil zir turin ṭhalai 3,640 an tirh chuah tawh thu a sawi a, "Mizo ṭhalaite'n hna an hmuh theihna atan MYC chuan training a buatsaih zel dawn a ni," a ti.

T Sangkunga hian Inrinni khan Aizawl Press Club-ah thuthar thehdarhtute a kâwm a; state páwna ṭhalaite tirh chhuah an nih bakah, Mizoram chhungah pawh training an buatsaih ṭhin thu sawiin, "Central YMA leh pawl hrang hrangte nena ṭang tlángin tualchhungah ṭhalai 1,788, thil chi hrang hrang zirtir an ni tawh," a ti a; tualchhungah ṭhalaite chu cement mistiri, aluminium mistiri, puan-
ṭhui, mobile phone handset siam leh lirthei siamte zirtir an nih thu a sawi.

MYC Chairman chuan, MYC-in detailed project report (DPR) an siam Rs. 2,51,00,000 hû chu tun hnai khan DoNER Ministry-in a pawm thu a sawi a, "First instalment-ah Rs. 1,88,25,000 hmuh a ni tawh," a ti.

Tun hma lamin passport dik lo hmangin Mizo ṭhalai tam tak Singapore-ah hna thawkin an kal tih sawiin, T Sangkunga chuan, "Heng mite hian hrehawm takin hna an thawk ṭhin. Singapore-a Mizo nu pakhatin rawtna a siam angin tunah hian dan dik takin Mizo ṭhalai 35 chu senso tlem zawka Singapore-a hna thawk tura tirh tum mek an ni," a ti a; Singapore-a tirh tur Mizo ṭhalaite chu uluk taka training pek an nih tur thu a sawi.

MYC Chairman sawi danin, North Eastern Council-in Delhi-a World Class Skill Centre-a kum khat training hnua hna hmuh theihna a ruahman angin a kal duh tur ṭhalai an zawng mek a ni a, ṭhalaite tan ngaihven theih a ni. Kumin January 29 leh February 1 inkarah sipai lâk rûnpui neih tum a ni a, inbuatsaih duhte tan MYC-ah ngaihven theih a ni bawk.