Minister-in Khawzawl leh Saitual tui lâkna en

PHE minister Zodin­tluanga chuan, January 9, 2016 khan Greater Khawzawl Water Supply Scheme siam mek leh Greater Saitual Water Supply thawh zawh tawh a hmunah a enfiah a, PHE engineer-te'n an
ṭawiawm. He hunah hian ruahmanna ṭha zawk nena project zir chiang turin team thar an din nghal.

Zodintluanga chuan, "Heng project pahnihte hi fûr tuilianin a tichhia a, hlawhchham mai thei dinhmunah an ding a. A enkawltute an buai em em a, kan zavaia kan hmuh a, kan tihsual aṭanga kan insiamṭhat theih ka duh," a ti a; tuna tihsual chu a hnu zela insiam ṭhatna tur a nih thu a sawi.

Khawzawl leh Saitual tui lakna Minister-in a ennaah hian PHE engineer, SDO aṭanga engineer-in-chief thlengin kal vek tura tih an ni a, harsatna vanga pahnih/pahnih tih loh chu an kal vek a ni.

PHE Minister hian Greater Khawzawl WSS a en hmasa a, chumi hnuah Greater Saitual WSS a en leh a; a hmunah engineer-te'n project a puitlin theih nan rawtna hrang hrang an sawi lang nghal. Rawtna a tam avangin a thiam bik mi tlemtê awmna team siamin, thla khat chhunga hmalak nghal a nih theih nan ruahmanna siam turin an ti a ni.

Saitual tui lakna hi siam zawh tawh niin, tui an pump chhin nghal a; mahse, fel lo a tam avangin fûrah a chhiat vek a hlauhawm a, ruahmanna thar an siam dawn a ni. Khawzawl tui lakna chu July 2015 khan fûr ruahtuiin a khuahna ber a len chhiat avangin siam
ṭhat leh a ngai dawn bawk.

Saitual chawm tur tui lak nan hian Tuivawl lui khuah a ni a, a khuaptu chu Excelsior Merchants Pvt. Ltd., Kolkata an ni. February 9, 2011-ah khuap ṭanin, sum ruahman chu cheng vbc. 21.53 aṭangin vbc. 19.01 an hmang tawh. Saitual bakah, Keifang, Rulchawm leh Ruallung châwm tura ruahman a ni a; kum 2043 thleng daih tur niin, mi 35,000 châwm thei tura ngaih a ni.

Greater Khawzawl WSS siam hna chu Gangwal Engineering Constructions, Silchar-in an thawk a, March 19, 2013-ah hna ṭanin, sum ruahman chu vbc. 24.97 a ni a, cheng vbc. 12.35 an hmang tawh. Kum 2028 thlengin mi 24,000 châwm thei tura ngaih a ni a, khawl dah belhin kum 2042 thlengin mi 36,000 a chawm thei tura ngaih a ni bawk.