Food Security atan inbuatsaih zel Central-in February-a hman a duh

Food, Civil Supplies & Consumers Affairs (FCSCA) department chu February 2016-a Food Security Act (FSA) Mizorama hman
ṭan ngei tumin a inbuatsaih. Sorkar laipui pawhin February thlaa FSA hmang hman turin Mizoram sorkar a hriattir.

FCSCA hotute hnen aṭang-a thu dawn danin, sorkar laipui
aṭanga FSA chungchanga Mizo-ram inbuatsaih dan rawn endiktu chuan FSA hmang tur hian Mizoram chu a inpeih thawkhat tawhin a hria a; chuvang chuan sorkar laipui chuan February thla chhung ngeia kalpui turin Mizo-ram sorkar hotute a hrilh a ni.

Vanglaini palai zawhna chhangin FCSCA hotute chuan, February thla chhung ngeia FSA hmang turin theihtawp an chhuah thu an sawi a, "February thlaa hman ṭan ngei kan tum a, kan inbuatsaih zel. Han kalpui tak tak dawn chuan thil buaipui ngai a tam khawp mai," an ti.

FCSCA hotute sawi danin, FSA-in a huam tur chinte chu an thlang fel vek tawh a, benificiary atana thlan chhuahte chu endik zawh thawkhat an ni tawh a, siamṭhat ngai awmte chu an siamṭha nghal zel a ni.

FSA hian Mizoramah mi 7,06,296 a huam dawn a, chu chu kum 2011 chhiarpui aṭanga chhûtin thingtlangah 81.88% leh khawpuiah 48.60% huam ang a ni. Danin a huamte chuan buhfai kg. khat Rs. 3 zelin thla khatah kg. 5 an lei thei ang. Mahse, tuna ruahmannaah chuan sorkar laipui thu angin mi 6,00,000-ah FSA hi kalpui phawt tum a ni.

FCSCA dept. hotute chuan FSA hman hun turah hian bituk an lo nei tawh ṭhin a, mahse harsatna hrang hrang avangin an hun bitukah an hmang thei ṭhin lo.