AMC-ah IT Cell thar
Aizawl Municipal Corporation (AMC) chuan an inrelbawlna ṭhenkhatah kalphung thar neiin, Information Technology (IT) Cell an din thar mek a; hna thawhna man (bill) pek chhuah danah kalphung thar an nei bawk.
AMC-ah IT Cell din thar a nih thu leh an peih thawkhat tawh thu sawiin, AMC commissioner Dr H Lalthlangliana chuan, "AMC aṭanga lehkha pawimawh hrang hrang, building, dawr licence leh hoarding chungchang leh lehkha pawimawh hrang hrang la chhuak tura hmun hla tak
aṭanga sum tam tam senga Rs. 20 vel man form lak chhuah ngai
ṭhin hi mipui tan a hautak a. IT Cell kan hawn hunah chuan form hrang hrangte chu internet
aṭangin download theih a ni ang," a ti.
Dr H Lalthlangliana chuan, IT Cell hawn hunah chuan Central aṭanga AMC tana Gene-ral Basic Grant leh Per-formance Grant sum lo kalte chu an rawn pek ní leh hunte an hre zung zung tawh dawn tih a sawi a; tunah chuan sum an rawn pek hun chu Mizoram sorkara Finance department tan lo chuan hriat a harsa rih hle tih a sawi.
AMC Commissioner chuan, AMC hnuaia hna thawh reng reng a hmun-ah endik vek a nih hnuah chauh bill an pe tawh tih a sawi a, "Hnain a ṭhat phah a, hna thawh dik tak, a tak awm ngei chiah pawisa kan pe tawh," a ti.
Dr H Lalthlangliana'n Vanglaini a hrilh danin, AMC hnuaia hnathawh zawng zawng chu sum pek chhuah hmain thawktute'n a hmunah an enfiah hmasa zel tawh. November 2015-a AMC inthlan hmaa sum hman dan mi ṭhenkhatin RTI Act hmanga an dil chhuah chungchang chhui chiangtu tur 'Fact Finding Team' an din tawh bawk.
AMC hotute hnen aṭanga thu dawn danin, Central aṭang AMC tana sum lo kal General Basic Grant (GBG) leh General Performance Grant (GPG), Mizoram sorkarin a la pek chhuah loh cheng nuai 812 vel a awm.
AMC hian kum kal mekah sum dawn tur a la nei a; chu'ngte chu - GPG 2014-15 second instalment atan cheng nuai 665, state (GIA) salary-ah AMC tan nuai 80 leh Aizawl Development Authority tan nuai 40, state GIA non-salary-ah Renumeration of Local Council atan nuai 7.35 leh non-salary atan nuai 20-te a ni. Hun tiam chhunga sum pek chhuah loh vanga Mizoram sor-karin sum a chawi tur eng emaw zat a awma ngaih a ni bawk.