Sairang-Lengpui kawng hlui chei ṭha

Mizoram PWD chuan Leng-pui Airport panna kawng a hnaih zawk nan Sairang-Lengpui inkarah kawng hlui an chei ṭha a, tunah hian hman mek a ni.

PWD enkawlnaa Chief Minister puitu minister Lal Thanzara chuan Vanglaini zawhna chhangin, Sairang leh Lengpui inkara kawng hlui an chei ṭhat chu Sihhmui-Lengpui, December 2015-a Tlawng lei chim ta lam kawng ai pawhin a hnai zawk tih a sawi.

Lal Thanzara sawi danin, Sairang-Lengpui kawng hlui hi Sairanga Tlawng lui luh thlakna kawng zawhin, Tlawng lui a kân a, Lengpui khuaah a chhuak chho a ni. Kawng hluiah hian Tlawng lui kam, Sairang ràlah miin nûl an lo siam tawh a, nûl chu a siamtute'n kaltlang an remtih loh avangin hêl a ni.

Minister chuan, kawng hlui chei ṭhat chu tun hmaa hman
ṭhin, hluihlâwn tawh a nih thu leh a kawng pawh a zîm thu a sawi a, "Blacktop loh a ni a, lirthei tê chi chauh kal phal a ni. Lirthei intawh pawhin a buaithlak deuh a, tluang taka tlan chuan minute 15 vel chhungin Lengpui a thlen theih," a ti.

Lal Thanzara chuan, Sai-rang-Lengpui kawng hlui chei ṭhat chu chei chhunzawm tum a nih thu a sawi bawk.

Hetih lai hian, December 2, 2015 zana Sihhmui-Lengpui kawnga Tlawng lei chim chu dawh ṭhat tumin PWD-in hma an la mek a ni.