RD-in tar pension sum pek dan a thlak Mizoramah tar pension mi 25,469 pe mek
National Social Assistance Programme (NSAP) kaih-hruaina anga Mizorama kum upate tana Ministry of Rural Development-in sum a rawn pek dan chu tun hnai khan a tidanglam a, thla ruk chhung zel a hlawma pek tawh turin a ti. Mizoram pumah kum upa, pen-sion la mi 25,469 an awm mek.
Ministry of RD-in tar pension pek dan thar a ruahman angin, Mizoram sorkar chuan a vawi khatna atan thla ruk chhung, April 1 - September 30, 2015 thleng atan Krismas hma khan a pe chhuak a; Social Welfare department hotute chuan, "Sorkarin kum upate a ngaihsak a, file-in Treasury-a thlen tawh chuan pawisa a tâng ngai lo," an ti.
Social Welfare department hotute sawi danin, sorkarin tar pension pawisa pek chhuah kawngah Treasury-ah sum a táng ngai lo a; tuna thla tina sum an pek theih loh chhan chu kum 2014-2015 aṭangin Ministry of RD-in thla ruk chhung a hlawma a rawn pek tawh vang a ni.
Central-in a rawn pek chhuah veleh Finance leh Plan-ning lamah an bawhzui nghal a, Finance leh Planning-a a fel chuan Treasury-in a pe chhuak nghal a, K-Deposit-ah sum dah a ni ngai lo.
NSAP hnuaiah hian Social Welfare department chuan thil chi thum a kalpui mek. Tar pension tia sawi, kum 60 chin chung lam tana pek
ṭhin, Indira Gandhi National Old Age Pension Scheme te, kum 40-79 inkar tana pek
ṭhin, Indira Gandhi National Widow Pension Sheme leh, kum 18-79 inkar tana pek, Indira Gandhi National disable Pension Sheme-te a ni. Heng pension chi thumte hi lak kawp theih a ni lo.
Social Welfare-in kum 60 chin chung lam, tar pension a pek chu chi hnihah ṭhen a ni al kum 60 leh a chung lam tan thla khatah Central-in Rs. 200 leh Mizoram sorkarin Rs. 50, a vaiin Rs. 250 pek a ni. Hetiang hi Mizoramah mi 21,202 a pe mek.
Kum 83 leh a chung lam mi 4,267 hnenah pension pek mek a ni a, Central-in Rs. 500 leh Mizoram sorkarin Rs. 50, a vaiin Rs. 550 thla tin pek a ni. Tar pension la mek zat chu mi 25,469 an ni.
Social Welfare hotute chuan, NSAP-in kum 80 tling chinah pawh, bithliah zat mi 4,267 an neih tâk avangin kum 83 tling chin mi 4,267 chu an thlang chhuak niin an sawi a; an thlan hnuah kum 80 tling mah se, kum 83 hnuai lam chuan Rs. 250 an la ve mai a ni.
Tar pension pek ṭhin hi Mizoram UT a nih ṭan aṭanga pek a ni a, state sorkar sum
aṭanga pek ṭhin a ni a; kum 1995 aṭang khan NSAP hman niin, state-in pawisa a pek ṭhinte chu NSAP hnuaiah khung luh vek a ni. Chutih lai chuan, mi pakhat tan Central-in Rs. 75, state sorkarin Rs. 25, a vaiin Rs. 100 a ni. Kum 2007 velah NSAP-in sum tipungin, mi pakhat tan Rs. 200 a pe a, state sorkarin Rs. 50 pein, a vaiin Rs. 250 a pe.
NSAP-in a dawng thei kaih-hruaina a siamah chuan, BPL chhungkuaa mi an ni tur a ni a, kum 60 an tling tur a ni. Pawisa chu bank kaltlang veka pek tura tih a nih laiin, account hawng thei lo an awm avangin an chhungte nen joint account hawn phalsak an ni. Harsatna dang la nei, sum faia pek an la awm nual bawk.
Kum 60 chin leh a chung lam
Bial Mihring zat
DSWO East 7,362
DSWO West 6,359
DSWO Lunglei 4,541
DSWO Saiha 2,940
Total 21,202
Kum 80 chin leh a chung lam
DSWO East 1,851
DSWO West 1,337
DSWO Lunglei 725
DSWO Saiha 354
Total 4,267
Grand Total 25,469