Bike khalhtute leh Larsap inkâwm

Hmarchhak mite inpumkhatna, in-unauna ṭha zawk awm theihna tur leh tam zawka inzin pawhna awm theihna tura feh chhuak, Highlanders, Royal Enfield Bikers Club, Halflong member 21-te chuan nimin khan Raj Bhavan-ah Governor Lt.Gen. Nirbhay Sharman an kâwm.

Governor chuan, Mizoram an rawn tlawh vanga lawmthu hrilhin, "Halflong aṭanga bike chuang mi rawn kalte hian hmarchhak mite inkarah remna leh inunauna chhawm nun zelna kawngah hma la zel ang che u," a ti a; Mizoram hmun hrang hrangte nasa zawk rawn tlawh tur leh mi dangte pawh hruai zel turin a sawm a ni.

India hmarchhakah hnam ziarâng inang lo tak tak tam tak an khawsaho tih sawiin, Larsap chuan, "Inunauna leh inhriatna ṭha zawk kan neih theih nan nasa zawka intlawhpawh kan mamawh. Mipui rawngbawlna kawngah Aizawl Thunders leh Mizoram hmun danga Enfield Bikers Club-te hmalaknate a chhuanawm hle a ni," a ti.

Highlanders, Royal Enfield Bikers Club rawn zinna senso hi Assam Rifles-in an tumsak a, Maj. Deepak Saini-a'n a rawn ho a ni.

Royal Enfield Bikers Club member rawn kalte hi hmarchhaka hnam chi hrang hrang aiawh member-te an ni a, January 10, 2016 khan Aizawlah an rawn thleng a ni.