DIG (NR)-in traffic police-te a fuih

Aizawl city traffic police-te chuan nimin khan Chanmari YMA Hall-ah inhlan tharna hun an hmang. An hun hmanpuitu, DIG (Northern Range) LT Hrangchal chuan, police zingah kum 30-40 inkar vela thi an tam lutuk chu pawi a tih thu a sawi.

LT Hrangchal chuan, police-te'n hriselna din-hmun ngai pawimawh se a duh thu sawiin, "Kumin January 1 aṭanga vawiin inkarah ringawt pawh police thi mi pariat vel an awm. Police thite zinga a tam zawk chu naupang tê tê an nih avangin, an hriselna an ngai pawimawh tawk lo niin a lang," a ti.

Police-te chu an thil chìn ṭha lote sim se a duh thu sawiin DIG chuan, naupang tê têa nupui fanaute thihsan a pawizia hre turin a chah a ni.

LT Hrangchal chuan, traffic police-te chu police hmél tilangtu an nih thu sawiin, "Police dang aiin in langsar a, chuvang chuan fimkhur leh nun uluk zual bik tur in ni. Ring lo mite'n an chìn
ṭhin anga kuttling loa sum lak duhna kawngah pawh traffic police-te chu fihlim vek turin ka duh tak zet che u," a ti.

Inkhawm hi Traffic SP C Lalthanmawia'n a kai-hruai a; inkhawma telte chu DIG hnenah an harsatna leh mamawhte thlenna hun siamsak an ni.