SEC-in inthlan hun sawn a tum lo Nomination thehluh hun a tâwp
August 27, 2020-a Mizorama village council (VC) leh local council (LC) inthlan tura tih tawh chu State Election Commission (SEC) chuan tun dinhmunah chuan sawn hlat tumna a nei lo. Inthlana chuh tumte tana hming pek luh theih hun chu nimin khan a tàwp a, he thu ziah lai hian nomination lut zat hriat theih a la ni rih lo.
Vanglaini palai zawhna chhangin SEC hotute chuan, VC leh LC inthlan hun sawn tumna a awm rih lo tih an sawi a, "Tunah chuan August 27, 2020-a inthlang turin inbuatsaihna kalpui zel a ni," an ti.
SEC hotute chuan, inthlan hun sawn dilna an la dawn loh thu sawiin, "Chanchinbu vel aṭang chuan inthlan hun sawn duh political party zingah an awm tih chu kan hria," an ti a, Covid-19 hripui léng chungchanga Mizoram dinhmun uluk taka an thlir ve reng thu an sawi.
Tarlan tawh angin, Congress party leh Mizoram BJP-te chuan August 10, Thawhṭannia thuthar thehdarhtute an kawmnaah, Covid-19 vanga Mizoram dinhmun thlirin, inthlan hun sawn hlat an duh thu an lo puang tawh a; thuthar thehdarhtute kaltlangin inthlan hun sawn turin sorkar leh SEC an ngen a ni. Vanglaini palai zawhna chhangin deputy chief minister Tawnluia chuan, VC leh LC inthlan hun sawn chungchangah sorkarin thuneihna a nei lo tih a sawi a, "Kan ram boruak thlirin, SEC hnenah inthlan hun sawn tura ngenna erawh sorkarin a thlen ve thei a ni," a ti.
VC leh LC inthlan hun hi August 5, 2020 khan SEC chuan an puang a, nomination thehluh hun hnuhnung atana ruat chu August 11, nimin kha a ni. He thu ziah lai hian SEC chuan district hrang hrang aṭangin nomination lut zat an la khawm mek a, nomination lut ziah chiah hriat theih a la ni lo.
VC/LC inthlan leh a kaihhnawih
• Inthlan puan ní - August 5, 2020
• Nomination thehluh hun hnuhnung - August 11, 2020
• Nomination endik hun - August 11, 2020
• Inhnuhdawh hun hnuhnung - August 13, 2020
• Symbol siam leh candidate tár chhuah - August 13, 2020
• SEC-a candidate list thehluh hun - August 14, 2020
• Inthlan vote thlak ní - August 27, 2020
• Vote chhiar hun - August 27, 2020
• Inthlan ṭhat ngai a awmin - August 28, 2020
• VC/LC din fel hun hnuhnung - September 4, 2020
• Inthlan kaihhnawih zawh hun - September 7, 2020