Chi bing zawnga Mizoram ṭhen kan tum lo: Lal Thanhawla
Chief minister Lal Thanhawla chuan, sorkarna an chan chhung chuan chi bing zawnga Mizoram ṭhen an tum loh thu a sawi a, "Hei hi mipuiin hria se ka duh," a ti.
Nimina Congress Bhavan hawnnaah thu sawiin Lal Thanhawla chuan, officer
ṭhukhawmin ram chhung hmun ṭhenkhata cheng, hnufual deuhte tana hmasawnna leh ṭanpuina awm thei tur an ngaihtuahna chungchanga sorkar thuchhuah a dik tâwk lo a nih theih thu a sawi a, Mizoram sorkarin Reang Development Council din tumna a neih loh thu a sawi.
Sorkar thuchhuah tarlan dan chuan, January 5, 2016 khan NITI Aayog hnuaia hmarchhak state huam chhunga Sixth Schedule area-te tana hmasawnna sum hâi chhuah nana project duan dan tur ngaihtuahin Planning Board vice chairman hoin NLUP conference hall-ah autonomous district council hotute leh a kaihhnawih department hotute an ṭhukhawm a ni.
Meeting chuan, Sialkal tlangdung te, Sinlung Hills Development Council leh Reang Development Area-te huam tela vantlang mipui mamawh uluk taka chhûta project duan ni se, an ti. Vantlang hriselna inenkawlna te, inkalpawhna kawng siam te, zirna sikul tihchangtlunna te, mipui eizawnna kawng ngaihtuahsakte leh ṭul dangte ngaihtuah chunga project uluk taka siam an rel a ni.
Hemi chungchangah hian Chief Minister chuan, Mizoramah Reang Development Council a awm lo tih sawiin, "Politics-a inchirhtheh tumna a awm ṭhin hi a pawi hle. Chi bing zawnga politics khelh tum ṭha kan ti lo a, fimkhur a ngai hle. Kan sorkar chhung chuan Zoram hi chi bing zawnga
ṭhen kan tum lo tih hi Mizo mipuite'n hria se ka duh," a ti.
Intih Mizo leh nationalist tum luat vanga ram páwna Mizote tana harsatna siam a hlauhawm tih sawiin Lal Thanhawla chuan, zirlai hruaitute chu politics khelhna atan an nihna an hmang duh a nih pawhin fimkhur taka kal turin a chah.
Reang Development Council chungchangah hian Home minister R Lalzirliana chuan, official-te demna tur an awm lo tih a sawi a, "Eng pawh ni se, a hminga in hruaitute'n Reang Development Council din tumna a awm lo tih kan sawi chuan awih mai tur a ni," a ti a; an party hruaitute thusawi ring ngam turin an party mite a chah.