Naupang huaisen lawmman dawng dawn

Kumin Republic Day-a Prime Minister hnen aṭanga naupang huaisen chawimawina dawng tur mi 25 zingah Mizo naupang, Ramdinthara (16) s/o VLMS Dawngliana, Saiha Vengpui a tel a, lawmman dawng turin nimin khan Aizawl a chhuahsan.

January 2, 2015 zan dar 8 vel khan Saihaa naupang pahnih - Moshedyan Lalramliana leh Beihrokhai te chu kawngpui bula electric transformer dahna hung chhungah tla lut palhin electric current-in a man ve ve a. Chutih lai chuan Ramdinthara leh a ṭhiante chuan naupang pahnih chetsualna chu thlengin, Ramdinthara chuan Beihrokhai chu a chhip samah manin hmun him lamah a thehchhuak hmasa a, Lalramliana pawh a chhip samah bawk ṭhâmin a chhanchhuak ve leh a ni.

Mi pahnih nunna a chhanhim avang hian Ramdinthara hi National Bravery Award dawng tlak zingah ngaiin Mizoram State Council for Child Welfare chuan Indian Council for Welfare hnenah a thawn a, award dawng tur zingah a thlang ve ta a ni. MSCCW hian Ramdinthara award dawng tura a kalnaah sum an pài a ni.