M/S zirtirtu 102-te thla hnih hnuah appointment la pe lo

Mizoram Public Service Commission (MPSC)-in Mizoram sorkar hnuaia middle school zirtirtu thawk tur lakna result a tihchhuah aṭanga thla hnih chhungin Mizoram sorkarin a tlingte hnenah appintment order a la pe lo. Appointment an la pek loh chhan hi an awmna tur an la tihchian loh vang niin an sawi.

Mizoram sorkara middle school zirtirtu tur lakna atan MPSC chuan kum 2015 laihawl vel khan written exam a buatsaih a, July 2015 tawp lamah result tihchhuah a ni. Written exam-a tlingte chu November 2015-ah personal interview neihpui an ni a, November 13-ah result tihchhuah niin, middle school zirtirtu atan mi 102 an tling.

Middle school zirtirtu lakna final result chhuah hnu thla hnihah pawh Mizoram sorkar chuan appoinment a la pe lo a, pek theih hun tur hriat a la ni lo.

Vanglaini palai zawhna chhangin, School Education department hotute chuan, middle school zirtirtu atana MPSC-in exam a buatsaiha tlingte hnena appointment order pek chu School Education department mawhphurhna a nih thu leh, MPSC-in zirturtu tura a chhawpchhuah (recommend)-te chu sorkarin a pawm tawh thu an sawi.

Tun thlenga appointment order an la pek loh chhan zawhna chhangin School Education hotute chuan, "An awmna tur rem fel chhung a rei a, hun a duh deuh a ni. Duhthusamah chuan, vawiinah sikul an lut leh ṭan a, appointment hi pek thuai kan duh," an ti.

Hetih lai hian, middle school zirtirtu atana thlante hnena appointment order pek hun tur an la sawi thei lo a; zirtirtu atana lak tharte chu thingtlang lamah dah tum an nih thu an sawi bawk.