Mizoten zu kan in thiam sâwt - Zira

Excise & Narcotics minister R Lalzirliana chuan, Mizoram Liquor (Prohibition & Control) Act hman a nih hnuah Mizo mipuite'n zu an in thiam sâwt hlea a hriat thu a sawi.

Nimina Congress Bhavan hawnnaah thu sawiin Excise & Narcotics Minister chuan, "Ruih tum ringawt rilru kan tlânsan tain ka hria. Zu in ve si loa zu rûite pawhin 'Kan ti lutuk e' tih nachang an hre dawnin ka hria," a ti.

R Lalzirliana chuan, Krismas hman zawh tak chu a tìrah chuan a huphurh hle tih sawiin, "Keini aia mithiam leh fing zawkte'n zu zawrh a nih chuan Zoram hrehawm dan turte an sawi nasa a, rilru a buai duh hle," a ti a; beisei loh deuha kum dang zawng aia muanawm zawka Krismas leh kum thar vuakvet hman theih a ni chu Pathian vang a nih thu a sawi.

Sawiselna nasa tak karah Mizoram sorkarin zu zawrh phalna dan a siam tih sawiin, Excise Minister chuan, "Inkhuahkhirh ringawt chuan hnam dang kan tluk dawn lo tih kan hre chauh a, beihna leh sawiselna karah MLPC Act hman a ni a, tun dinhmun hi kan thleng ta a ni," a ti.