Larsapin Chawngte leh Tlabung a tlawh

Governor Lt.Gen. Nirbhay Sharma chuan, nimin khan Indian Air Force helicopter hmangin Chawngte leh Tlabung khua a tlawh a, nimin vek khan Aizawlah a kîr leh nghal.

Larsap chuan Chawngte khuaa mipui leh sorkar official-te hmaah thu sawiin, “Ramri hnaiha chengte tihhmasawn a nih theih nan sorkarin nasa takin
ṭan a la mek a. Border Security Force, ramri hrûla inkulhte pawhin ramri venhimna bakah an awmna bula chengte ṭanpui leh tihhmasawnna kawngah mawhphurhna an nei a ni,” a ti.

Chawngte khaw mipui leh CADC huam chhunga awmte chu hmun kilkhâwr bera awm dangte ziarâng leh rilru pu lo tura ngenin Governor chuan, “CADC leh Mizoram sorkarah ṭhalai hna hmu lo zawng zawng thawh tur hna a awm loh avangin, kawng dang dap tumna rilru CADC area chhunga ṭhalaite’n an neih a ngai,” a ti a; CADC sorkar chu an thuneihna huam chhunga
ṭhalaite tan skill training lamah ke pên se a duh thu a sawi.

CADC report-in a tarlan dan chuan, CADC huam chhungah mi 53,057 an chêng a, chu’ng zinga 38.23% chu ziak leh chhiar thiam an ni. Sorkar office lian leh tênau awm 59 a awm a, zirna-in 144, bank pahnih, dak-in lian leh tê pakua a awm.

Governor hian Tlabungah chuan 166 Bn. BSF Company headquarters a tlawh a, official leh BSF hotute’n an lo hmuak.

BSF commandant chuan, Bangladesh nena ramri venhim hna an thawh dan tlangpuite sawiin, ruahmanna ṭha zawk nia an rinte Governor an hrilh.

Larsap chuan, an harsatna leh an hmachhawpte lo enfiah a tiam a, khawtual mite nen lungrual leh inpawh tak chunga ramri venhim hna thawk dun turin a fuih.

Governor Nirbhay Sharma hi Aizawl ṭangin minister of state Dr BD Chakma, secretary to governor Rodney L Ralte leh BSF DIG Brig. Uday Pathania ten an
ṭawiawm a ni.