Delhi tel lo economy kalpui kan tum - Zoramthanga

MNF president Zoramthanga chuan, Congress sorkarin sum leh pai dinhmun chhe tak nen Mizoram chu kum 2016 bul an ṭanpui nia sawiin, "Kan sorkar financial blood sugar hi a sang hle... Keini chuan Delhi tel lo economy kalpui kan tum," a ti.

MNF chuan nimin khan an party pisa, Mizo Hnam Run chu kum 2016 atan an hawng ṭan a, hawnna inkhawm chu senior vice president Tawnluia'n a kaihruai a ni.

Inkhawmah hian Zoramthanga chuan Mizoram leilungin tuna mipui lêt sarih vel a la châwm zo nia sawiin, "Gujarat anga foreign investment châwk luh vak a, a hna thawktuah chauh ram leilung fate chhawr hi kan tum a ni ve lo. Kan lei hnuaiah oil leh gas a tam a, kan ram leilung hausakna hâi chhuaha Delhi tel loa economy kalpui hi MNF Mission a ni," a ti.

MNF President chuan, sum leh paia sorkar a tlukchhiat chuan, mihring thisen chhe tawh lutuk tihdam theih tawh loh ang vel a nih thu sawiin, "Congress sorkarah hian development pakhatmah a awm lo a, ‘Development holiday’ a ni ringawt. Finance Minister-in mipui leh sorkar hnathawk a hnemna ber pawh ‘December thla hlawh chu kan pe thei ang che u,’ tih chauh a ni," a ti.

Aizawl leh Lengpui Airport inkar kawnga Tlawng lei chim chu ni tam a liam hnuah Congress sorkarin a siam-
ṭhatna turin kut a la thlak lo nia sawiin Zorama chuan, "Delhi, Kolkata leh Guwahati-te ang chu ni se, mipui an thinrimin an buai nasa tawh viau ang," a ti a; Rangvamuala kawng min pawh ruahsûr loh lai, ṭhál laiin a siamṭhatna turin kut an thlak lo tih a sawi.

Zoramthanga chuan, an thil tumte a taka tihhlawhtlin theihna turin ram a chhiat loh nana dái theu leh seng khawm hna thawh a pawimawh ber thu a sawi a, "Pathian leh mipui zarah kan sorkar leh a nih chuan kan ram leilung hausakna hâi chhuakin, kan inchuh luih luih sorkar hna leh contract/supply hna velah tumah kan buai peih tawh lo ang," tiin, mahni thawh rah aṭangin chhung tin tan malsawmna an hâi chhuak thei dawn tih a sawi a ni.