Kolasib district-ah ni 37 inhlawh tawh

Kolasib District Vigilance & Monitoring Committee chu nimin khan chairman CL Rual-a, Lok Sabha MP hoin Kolasib DC conference hall-ah an ṭhukhawm a; sorkar kum kal mekah MGNREGS hnuaiah ni 37 inhlawhna siam a nih tawh thu an tarlang.

CL Ruala chuan, hrilh lâwk loin hmasawnna hna kalpui mekte en chiang turin sorkar laipuiin mi a tír ṭhin tih sawiin, "An hmuh dan report chu MP-te hnenah an pe ve ṭhin. An hmuh dan chuan, Mizoram hian kan tichhe lem lo a, kan tichhiatna aiin kan tihṭhatna an hmu tam zawk. Tun aia nasa leh zawka inpekna thar nen kan thawh chuan a ti ṭha berte zinga mi kan ni theiin ka hria," a ti.

Lok Sabha MP chuan, sorkar hnathawkte chu hmasawnna kawnga mipuite ke pênpui tur atan a awm a ni tih hre renga theitawp chhuah a, mirethei leh mi harsa zawkte'n hmasawnna an neih theih zel nan inpekna thar nen hna thawk turin a fuih a ni.

Kolasib DC H Lalengmawia pawhin thu sawiin, Vigilance & Monitoring Committee meeting chu a pawimawh a, hmalak tawhnate en letna leh kan hnathawhte a huhoa sawihona hun a nih thu a sawi a, "Langtlang taka thil awm dante kan sawi leh thlirho a pawimawh a ni," a ti.

Meeting-a tarlan danin, Kolasib district-ah hian MGNREGS hnuaiah job card nei mi 17,749 an awm mek a, sorkar kum kal mekah ni 37 inhlawhna siam a ni tawh.

October-December 2015 chhungin nau piang 130 an awm a, damdawi-ina nausen thi pahnih leh thi saa piang pakhat awmin, ràicheha thi an awm lo. Hemi chhung vek hian Kolasib District Hospital-ah mi 946 admit an ni a, OPD-a inentir mi 7,437 an awm.

RMSA hnuaiah tun thlengin Kolasib district-a high sikul 13 sak ṭhat a ni tawh a, RMSA-in khaw 11-ah sikul thar an sa zo tawh a, Zanlawnah RMSA School chu sa mek bawk. Hortoki, Nisapui leh Bairabi-a sorkar high school thawm ṭhat nan Rs. 7,63,000 ruahman a ni.

PHE department-in Swacch Bharat Mission (Rural) hnuai-ah inthiarna nei lote tan êk-in an saksak mek a; Khamrang, Mualkhang, Meidum leh Saihapui 'K' ahte êk-in 79 an sa tawh a ni.