Congress party-in pisa an hawng

Mizoram Pradesh Congress Committee (MPCC) chuan nimin khan kumin atan Congress Bhavan an hawng a, office hawn puala inkhawm chu MPCC treasurer H Liansailova'n kaihruaiin, MPCC president Lal Thanhawla'n thu a sawi.

Lal Thanhawla chuan, "Tuna kan sorkarin a hmalakna hrang hrang hi tihhlawhtlin a nih chuan intodelh mai ni lo, kan hausak phah dawnin kan hria. Mahse, kan hmalaknaah hian kan fimkhur a ṭul," a ti.

MPCC President chuan, NLUP chu UNO thlengin ṭha an tih thu sawiin, "Party dang pawhin NLUP aia ṭha buatsaih an tum a ni awm a, a lawmawm hle," a ti a; NLUP chuan party dang rilru a ṭha zawngin a kai harha a hriat thu a sawi.

EVM thubuai chu chinfel a nih tawh tih sawiin Lal Thanhawla chuan, "EVM aṭanga sorkarna chan chu a harsa tih a lang reng tawh a, EVM khingtute chu thiam loh chantir niin, Rs. 100
ṭheuh chawitir an ni tawh. Sorkarna chu mipui vote hmanga chan tur a ni," a ti.

MPCC vice president R Lalzirliana chuan, a ṭum thumna atan inthlan leh hunah sorkarna an siam dawn nia sawiin, "Opposition lam in­hnemna chu 'Kum 10 bak a sorkar chhunzawm theih loh' tih a ni a, an hrechiang lo a ni; India ramah a záwna kum 10 aia rei sorkar an tam," a ti a; ring lo mite tih theih chu an tih theih ve tur thu a sawi.

MPCC Vice President chuan, inthlana sorkarna changtute an paihthlak chhan ber chu corruption vang a nih ṭhin thu sawiin, "Min sawiselna tur ringawt zawnga hun hmang opposition pawhin corupption-ah sawi tur an nei lo. Term hnih bak kan sorkar dawn, miin theih loah an ngaih hi kan ti dawn," a ti.

Office hawnnaah hian MPCC President chuan ZNP aṭangin an party-ah mi eng emaw zat a lawm lut a; chung zingah chuan ZNP
aṭanga Assembly inthlana candidate lo ni tawh K Laltuvela pawh a tel a ni.