Minister, MFA leh AFC-te'n Stadium enfiah

Sports & Youth Services minister Zodintluanga, Mizoram Football Association (MFA) president leh minister Lal Thanzara, MFA leh Aizawl FC official-te chuan nimin khan Rajiv Gandhi Stadium an tlawh a; I-League khelhna tura buatsaih a nih dante an enfiah.

Minister pahnihte hian RG Stadium chu Aizawl FC-in I-League an khelh meka home ground-ah an hman dawn avangin I-League khelhna tlak tura chei a nih dante an en kual a; chumi hnuah PWD, police, Mizoram Football Association aiawh leh Aizawl FC hotute nen stadium-a VIP lounge-ah thil pawimawhte an sawiho nghal a ni.

RG Stadium-ah hian Aizawl FC home match hmasa ber chu January 16, 2016 tlaiah khelh a ni dawn a, peih-fel a ni tawh tih PWD hotute chuan an sawi.

Meeting-ah hian footballer te, official-te leh entu mipuite venhimna leh hriselna chungchang te, traffic leh motor parking te, rîkrum thil atana inbuatsaih dan te, mikhual dawnsawn dan turte leh a hmunhma tihfai dan turte an sawiho.

Sports Minister Zodintluanga chuan, I-League match hmasaber thleng tur an nih avangin sorkar, MFA, Aizawl FC leh mipuite thawhhona a pawimawh tih a sawi a, “Tute mah rálbáng bik thei kan ni lo,” a ti.

MFA president Lal Thanzara pawhin Mizoram mipuite nghahhlelh I-League match khelh a ni tur chu lawmawm a tih thu leh a hlawhtlinna tura thawktute fakawm a tih thu a sawi.

Sorkar thuchhuah tarlan danin, I-League match-ah hian venhimna lam a khuah dawn a, player-te himna ngaih pawimawh a nih vangin venhimna khauh taka kenkawh tum a ni. Inkhelh laia mawi lo taka khawsa te, khelmuala luh tum te, player lo vawmte an awm palh chuan, hremna na tak club-in an tawrh theih avangin entu mipuite fimkhur turin an ngen.