KHAWTHLIR

Thisen pe

Saikhamakawn Branch KṬP chuan nimin khan an din champha lawm nan blood donation camp an huaihawt a, an member mipa 29 leh hmeichhia parukin Synod Hospital tan thisen unit 35 an pe. Dinthar Branch YMA pawhin AVBD ngenna angin Aizawl Civil Hospital-ah thisen an pe a, mipa pariat leh hmeichhia pathumin unit 11 an pe a ni.

Tanpuina sem

Serchhip Industrial Cooperative Society Ltd. chuan Serchhip DC Dr Lalrozama hoin nimin khan Serchhip khawpuia home hrang hrang leh Chief Minister's Relief Fund-ah ṭanpuina sum an sem. Ṭanpuina sum sem zawng zawng chu Rs. 35,000 a ni.

Sikul hawng

Parliamentary secretary TT Zothansanga chuan nimin khan Selam High School building sak thar a hawng. Selam H/S hi kum 1994-a din a ni.

MJA leh IPR

MJA general headquarters leh IPR department-te chuan vawiin chhun dar 12 hian IPR Auditorium-ah kum 2016 atana inhlan tharna leh lawmthu sawina inkhawm an hmangho dawn a, IPR minister Lal Thanzara'n a hmanpui ang. He hunah hian MJA member Aizawla awmte tel vek tura beisei an ni.

DIET Tour

DIET, Aizawla Faculty-te chu January 12, 2016 khan India ram hmun hrang hranga DIET-te tlawha Faculty Development Tour nei turin Aizawl an chhuahsan. Aizawl DIET hian India chhim lama DIET hrang hrangte an tlawh dawn a ni.

Workshop tan

Art & Culture depat. leh North East Zone Cultural Center ṭangkawpin hmeichhhiate tana an buatsaih, puantah, kut themthiamna lam leh hmunphiah siam zirna workshop chu nimin khan Archives Hall-ah ṭan a ni a, January 16 thleng a awh ang.