Assam-in ramri kaihhnawih sawiho a duh; Mizoram sorkarin a la chháng let lo

Assam sorkar chuan ramri kaihhnawihah inbiak an duh thu tun hnai khan Mizoram sorkarah a rawn thlen. Assam thu thlen hi Mizoram sorkar chuan a la chháng lêt lo.

Vanglaini palai zawhna chhangin Home secretary H Lalengmawia chuan, ramri kaihhnawiha inbiak an duh thu Assam-in tunhnaiah an thlen thu sawiin, "An thurawn rawn thlen hi ramri chungchang tak tak sawiho tur lam ni loin, ramri chungchangah engtin nge inbiakna kan kalpui leh ang tih leh state pahnih aiawh telna regional committee din chungchang a ni. Ramri chinfel lam a ni lo," a ti.

H Lalengmawia chuan, inbiakna kalpui leh dan tur vel chu sawiho chiam a ṭul tawh loah official lam chuan an ngai tih sawiin, "Political level-ah inbiak a ni tawh a, a bak chu official level-ah sawihoin, inbiakremna neih hnuah kan pute ve ve hnenah thlen leh turah kan ngai," a ti a; regional committee pawh Mizoram chuan boundary committee a neih avangin din a ṭul kher loh theih thu a sawi.

Assam sorkar thu thlen chu an la chháng lêt lo tih sawiin Home Secretary chuan, "Sorkar thuneitute hnenah file kan kaltir mek a, anni thutlukna ang angin kan kal ang," a ti.

Mizoram sorkarin Mizoram ramri china a pawm leh thil dangte Assam sorkara a thehluh tawh chungchang Assam lamin an chhàn leh chhàn loh chungchang zawhna chhangin H Lalengmawia chuan, chhànna an la dawn loh thu a sawi.

Tarlan tawh angin, Mizoram sorkarin Assam sorkar hnena an thu thehluhah hian Assam-in an state chhung anga a hauh mek khaw 62 chu Mizoram chhunga mi a nih thu leh Mizoram chhunga rîn luh tur a nih thu tarlan tel a ni.

November 17, 2022-a Guwahati, Assam-a Mizoram sorkar leh Assam sorkar aiawhte inbiak ṭumin Joint Declaration-ah Mizoram sorkarin ramri china a pawm chhunga khaw awm te, a huam chin te, geo spatial extent te, a huam china chêngte hnam chanchin leh chi (ethnicity)-te leh chanchin dangte Assam sorkarah thehlut tura tih a ni.

Joint Declaration-ah chuan, "Heng chanchin thehluhte hi ramri buai chinfelna tura la din tur state pahnih aiawhte telna Regional Committee-in an enfel ang a, chanchin lâk khawm kawngah Assam sorkarin a theihna apiangah Mizoram a pui ang," tih a ni.

Inbiaknaah hian Mizoram team chu Home minister Lalchamliana'n a ho a, Assam team chu Assam Border Area Protection and Development minister Atul Bora-a'n a ho thung.