Party dangin ZPM sawisel loin thu an sawi zo thiam meuh lo - ZPM Working President

ZPM working president K Sapdanga chuan nimin khan Serlui bial khaw hrang hrang a tlawh a, an party hruaitute nen an inkawmnaah party dangin ZPM sawisel loin thu an sawi zawh thiam meuh loh thu a sawi.

K Sapdanga chuan, ZPM chuan party dang an hming chhala sawisel bawl bawlte hi an hreh hle tih sawiin, "Kan hotute pawh hian chutiang chu ti lo hram turin min chah ṭhin a ni. Chutihlai chuan kan elpui party-te chuan ZPM sawi tel lo hian thu an sawi zo thiam meuh lo a, kan party hming lam hi thupui berah an nei ta hial mai," a ti.

An elpui party-te'n Lalduhoma nen inkar nei, harsatna nei angin an sawi ṭhin tih sawiin K Sapdanga chuan, "Kan party mite zingah lo awih tawk kan awm leh ṭhin. Pu Duha nen kan inngeih lo dawn a nih chuan a thiam lo zawk ka ni dawn tih lo ring nghal turin ka chah duh che u," a ti a, an khingpuite'n dawt hmanga an puh thu a sawi.

ZPM Working President chuan an party chu 'in taima ber a, in phur ber bawk' tia an sawi ṭhin thu sawiin, "Kan party mite ai mah hian neutral kan tihte hian ZPM sorkar hun hi nghakhlel takin an thlir mek. Kan CM candidate-in a sawi tam em em chu ZPM chu kan thawkrim ber tur a ni a, kan rinawm tur a ni a, eiru ve lo ngam kan ni tur a ni, tih hi a ni. Kan hotupa berin chutiang chu min chah ṭhin avangin vawiinah hian kan thawkrim a, thawhrimna hmanga sorkar tuak chhuah hi kan tum ber a ni," a ti.

Sorkar sikul chu zirlai tlem tial tialna hmunah chhuah mek a nih thu sawiin K Sapdanga chuan, "A lungchhiattlak tak zet a ni. Thil ṭha ti tur hian Delhi aiin a let tam takin chance kan nei ṭha a, kalphung thar hmanraw hmangin Delhi lehpelh kan tum dawn. Kan theih ngei pawh kan inring a ni," a ti a, an lehpel thei lo a nih pawhin state dang ke pen rual tala kal ve theih erawh an inbeisei tlat thu a sawi.

K Sapdanga sawi danin, sorkar hnathawkin hlawh tlai taka an lak tak chhante chu thil dang vang ni loin, tute emaw restricted tender hmanga an duhsak uchuak vang leh SEDP an sem mekte nen hian a inkaihhnawih vek a ni. Sorkar hnathawkte hian inthlan an nghakhlel em em a, anni aia nghakhlel zawk chu ṭhalaite an ni.

Sorkar ṭha an tuak mek tih sawiin ZPM Working President chuan, "Ṭhalaite'n an nu leh pa party ruh em em ṭhinte kalphung thar mipui sorkar vote tawh turin an kar mek a ni," a ti a, foreign aṭangin Mizo ṭhalaiten an nu leh pate kalphung thar lo tuakchhuak ngei turin an chah ta mawlh mawlh niin a sawi.