Kan ram leh hnam tana nunna hlan huama pen chhuakte ngaihhlut lehzual an ṭul - MNYF

Mizo National Youth Front (MNYF) chuan hnam pasalṭhate hriatrengna ni (Martar Day) vawi 42-na September 20, 2023 a lo thleng tur pualin vawiin hian two wheeler hmangin ‘Mizo Nationalism Rally’ an buatsaih dawn a; ram leh hnam tana nunna hlan huama pen chhuakte ngaihhlut lehzual an ṭul thu an sawi.

MNYF hruaitute chuan nimin khan Aizawl Press Club-ah thuthar thehdarhtute kawmin, vice president Zodinpuia chuan Mizo ṭhalaite zingah hnam hmangaihna rilru (Mizo nationalism) nasa takin a indinthar chho leh ta niin a sawi a, "MNYF chuan lawmawm kan ti hle. Mizote hnamdang lak aṭanga chimrala kan awm mai lohna tur leh, hnam anga kan dam khawchhuah theihna tur hi MNF chuan a thlir ber a nih avangin hnam hmangaihna thinlung nei tura nasa taka kan inzirtir chhohzel hi ṭul kan ti," a ti.

Zodinpuia chuan Mizoram history thlir chuan Mizo hnam pasalṭhate kha ṭhalaite an ni tih sawiin, "India lak aṭanga Mizoramin zalenna a sual pawh khan a bulṭantu chu Mizo ṭhalaite bawk an ni. Ram leh hnam hmangaihtu Mizo ṭhalai rualten huaisen taka hnam tana an lo beihna avangin Mizoram chu hnamdangte chimral lohin kan awm theih phah," a ti a, sorkar hnalakna chungchangah pawh hnamdangte chimbuai theih loa Mizoram a awm chhan chu MNF leh hnam pasalṭhate thawhrah niin a sawi.

Politics khawvelah pawh ṭhalaite’n ram leh hnam tana nunna hlan huama lo pen chhuak tawhte chawimawi a, an ngaihhlut lehzual a ngai ta tih sawiin MNYF Vice President chuan, "Kan hnam pasalṭha (freedom fighter) ten ram leh hnam tana sulhnu min hnutchhiahte hi keinin kan chawisan loh chuan hnamdangin min chawisan sak ngai dawn lo tih hria in, Zoram zalenna tura penchhuakte i chawimawi thar zel ang u," a ti.

MNYF hruaitute sawi danin, Mizo Nationalism Rally hi chhun dar 12-ah AMC Office bul, Ṭhuampui Veng aṭangin MNYF president Dr L Thangmawia, MLA chuan a vailiam dawn a, kharna inkhawm chawhnu dar 2-ah Vanapa Hall kawtah neih tur niin, MNF sr. vice president Tawnluia'n a hmanpui ang. Rally pual hian Mizoramin zalenna a sual laia hnam puanzar (Mizoram flag) pholan a ni dawn.

Rally-a tel tur hian Zoram zalenna tura nunna hlantu, hnam pasalṭhate ngaihlutu zawng zawng leh Mizo hnam hmangaihtute MNYF chuan an sawm a ni.