MPCC-in thudik chanve hmanga mipui bum tumah Duhoma an puh

MPCC chuan thuchhuah siamin, September 15, 2023 a ZPM Champhai North Block Conference neihnaah ZPM leader Lalduhoma chuan Mizoram sorkar leiba chungchang a sawinaah sorkar leiba tam tak inchhekkhawl mek chu tun sorkar lai mek leiba chauh ni loin, sorkar hmasa aṭanga inchhekkhawl chho zel a nih thu a sawi tih tarlangin, "Hei hi kan ngai thutak hle a ni," a ti.

Document ṭha leh rintlak hai chhuah zung zung tur a awm tawh laia, thudik chanve hmanga mipui bum tumah Lalduhoma puhin MPCC chuan, "Kalphung thar an aupuiah beisei tur a awm chuang loa, eng nge an kalphung thar chu tih hi kan ngaihdan a ni. MNF sorkar apiangin Mizoram sorkar leiba a pung nasa tih hi thudik a ni," an ti a, Lalduhoma sawi angin kan leibate hi GSDP aṭanga teh tur a nih thu an tarlang.

MPCC tarlan danin, kum 2008 aṭanga Congress a sorkar aṭang khan kan leiba nasa takin a kiam. Kum 2018 Congress term tawpah Mizoram sorkar leiba chu 32% ah tla thlain, MNF sorkar leibat sa, GSDP aṭanga teha 71.5% lai Congress sorkar khan a rul. Hei mai ni loin June 30, 2016 a RBI a Ways & Means hmanga a sum puk kha Congress sorkarin Ways & Means hmanga a sum puk hnuhnun ber a ni.

Assembly House-ah ngei pawh Lalduhoma hian 'Mizoram leibat chungchang sawiin kum 2018-2019 a Congress a tlak kum khan fiscal deficit hi vbc 352.93 kan nei. Chu chu 1.58% a ni. Vawiinah hian khatihlaia Finance Minister Pu Lalsawta khan a ti ṭha a ni tih ka sawi duh a, ka ṭan a ni lo, thudik ka sawi a ni. 3% chin kha min phal sak a, 1.58% ah fiscal hi a ti hniam thei. A fakawm a ni. Tunah MNF a lo sorkar veleh a, kum khat a han sorkar a, 1.58% aṭang khan kum khat chhung lekin vbc. 2,215 fiscal deficit nei hmanin 8.34% a chho hman a ni' tiin a sawi.

MPCC chuan a awmna hmun a zira a thusawi danglam ṭhinah Lalduhoma puhin, "Assembly House-a Pu Lalsawta sum enkawl thiamzia a sawi hnu a, political platform aṭanga leiba chungchanga Congress hmer tel a tum leh ta mai hi Congress party chuan pawi a ti hle," an ti a, thudik hai chhuah mai tur a awmlaia mipui bum zawnga thusawi tawh lo turin Lalduhoma an ngen.