Mipuiin ZPM chungchanga thudik an hrechiang ta - MNF Adviser

MNF chuan nimin khan an pisa-ah chhung inkhawm an hmang a, thusawitu MNF adviser Robert Romawia Royte chuan mipuiin ZPM chungchanga thudik an hrechiang ta niin a sawi.

Robert Romawia chuan, mipuiin political party leader ni turin mize nghet, zuanglawr mai mai lo an duh nia sawiin, "Tuna ZPM Leader ang chi, political party pakua-a zuang lawra fail vek tawh hi a party 10-naah pawh a fail leh mek. Super CM tura enchhin chi a ni lo. ZPM MLA candidate list en ila CM atan Pu Duhoma test duh tur chu tlemte an ni," a ti.

ZPM inzirtirna ṭha lo tak avangin a mi hriatchian tak takte pawhin ZPM an nihna chu thianghlim famkim nihna emaw an ti nia sawiin Robert Romawia chuan, "ZPM ni ve lo chu an rawngbawlpuite thlengin bawlhhlawh leh thil ṭha engmah ti lo ang maiin an diriam fo mai," a ti a, ZPM hian Mizo hnam leh Zoram tan thil ṭha a ti ve tawh em, Mizoram sorkarin thil ṭha tam tak a tihah hian an tel ve meuh em, tih chu a zawhna a nih thu a sawi.

MNF Adviser chuan mipuiin ZPM chungchanga thudik an hrechiang ta nia sawiin, "Unit kan din dawn lo ti ṭhin khan a theihna apiangah zak miah loin an din. MLA hlawh sang kan la ve dawn lo an tih laiin a la hmasatute an ni. MLA car man tur sum kan dawng ve dawn lo, designation plate tar ve loh tur an ti em kha? A titute hi MLA car leina atana a sum la hmasa leh MLA designation plate pawh a tar fiah fiah an ni," a ti.

Robert Romawia chuan ZPM rorelna - Lunglei Municipal Council (LMC)-ah an hnathawh awm chhun chu car thar lei a nih thu sawiin, "Lunglei mipuiin an thlang sual tih an hre ṭan mek. Thianghlim famkima an ingaihna tak hi Pathian leh mihring tehna aṭang pawha an fail-na chu a ni," a ti a, ZPM chu an thil tihah an nihna a lan thu a sawi.

Congress party chungchang sawiin MNF Adviser chuan, "An hun a liam tawh. Ṭhenawm state-ah an tlachhe vek tawh a, Mizoramah pawh an hmalam hun a thim khawp mai. ZPM ang maiin a fing apiangin an chhuahsan mek a ni. ZPM, Congress leh BJP-a la awm mekte inngaihtuah chianga opposition-a awm reng ai chuan, ruling party ni zui zel tur MNF party-a lo lut ve turin ka sawm tak meuh che u a ni," a ti bawk.