Politics khelhna atana chauha Nationalism hmangah MNF puh

ZPM Ṭhalai chuan MNF party chu politics khelhna atan chauha Mizo nationalism hmang ṭhinah puhin, sipaite tana special scheme siam turin MNF sorkar an phut.

ZPM Ṭhalaite chu nimin khan an pisa-ah ṭhukhawmin, meeting kaihruaitu vice president Zoramchhana Sailo chuan, "MNF party hi politics khelhna atan chauha Mizo nationalism hmang ṭhin an ni. India hnam puanzar hnuaia tlawmna thu ziaktu MNF party hian Mizo nationalism chungchângah sawi theih engmah an nei tawh lo," a ti.

Zoramchhana Sailo chuan ṭhangthar mi thiam tak takte an rawn chhuak zel nia sawiin, "MNF party hian politics khelhna atan chauh nationalism an duh tih hi a taka hai lanin a awm zel," a ti a, tun hnaia MNYF Vice President-in MNF chu Mizo nationalism vawng rengtu an nih thu a sawi chuan ṭhangthar mithiamte nuih a tihzat bakah, lu chhum ban chhum huama a taka zalenna sualtu la damte thinlung a tihnat thu a sawi.

ZPM Ṭhalai Vice President chuan hnam sipaite leh an chhûngte din chhuahna tur khawpa hmalakna MNF sorkârin engmah a la nei lo tih sawiin, "An intiam ang ngeiin an sorkârna term tlak hma hun tlemte an neih chhung hian hnam sipai leh an chhûngte tân special scheme siam turin na takin kan phut," an ti.