Hnam inpumkhatna chawi nunna tura 2 Assam Rifles Lakhimpur Battalion ruahman, National Integration Tour (NIT) 2023-a kal tur Mizoram Journalist Association (MJA) member-te leh anmahni hruaitu turte chu nimin khan Tourism minister Robert Romawia Royte-n Gajraj Hall, 2 Assam Rifles tualzawl aṭangin a vailiam.
Tour-a MJA member kalte MJA general hqrs. treasurer C Lalhmachhuana leh secretary K Zothanpara hoin member pariat an ni a, Mizoram chhuahsanin Assam an pan a ni. An cham chhung hian Assam, Arunachal Pradesh leh Meghalaya state-a hmunhma pawimawh hrang hrangte an tlawh dawn a, September 26, 2023 thleng a awh dawn a ni.
Robert Romawia Royte chuan, National Integration Tour thil tum chu ropui a tih thu leh tun dinhmun ngaihtuaha hnam inpumkhatna lam hawi program buatsaih a ni chu finthlak a tih thu a sawi a, "Hnam inpumkhatna tour kaltlanga MJA member leh zirtirtute tana tour buatsaih hi a lawmawm a, Mizo hnam ziarang leh nunphung mawi tak takte midangte zirtira lantirtu nih tum ang che u," a ti a; hnam inpumkhatna kawnga Mizoram sorkar leh Assam Rifles hmalaknate bakah, Mizoram Tourism chungchang tarlangtu nih tum turin a chah.
Prime Minister-in tourism chawilar nan India khua leh tui te, kum khatah khualzinmite tlawh ṭhin tourist destination hmun 12 tal tlawh tura a chah thu sawiin Tourism Minister chuan, "Mizo mipuite tourism chawilar nan mai bakah, rilru leh taksa tih hrisel nan Mizoram chhunga khualhip nasa tourist destination pawimawh tak tak te, pipu sulhnu leh mahni khawchhuahnate tlawh ṭhin turin ka chah a ni. Hnam inpumkhatna chu sorkarin a ngai pawimawh a, hemi vawngnung tur hian theihtawp chhuahin ṭan a la reng," a ti.
Tour kal turte thlahna inkhawmah hian 23 Sector Assam Rifles DIG brigadier Girish Upadhya, 2 Assam Rifles Adjutant major Aditya Sombanshi, 2 Assam Rifles Commandant colnel Mukesh Sauhta te, MJA general hqrs. president C Lalrambuatsaiha leh member dangte an tel a ni.