Jail tang tlan chhuak man a ni

Siaha District Jail aṭanga tlan chhuak, Central Jail, Aizawla man, police kut aṭanga tlanchhuak leh Vanrampana (24), Meisatla, Siaha chu nimin chawhma dar 11 vel khan man leh a ni.

Vanrampana hi Pathianni, September 17 khan Kanan Venga chenna in pakhatah lutin, an scooty a ru chhuak a ni. Police-te chuan Vanrampana zawn hna hi ngawrh taka thawkin, nimin chawhma dar 11 vel khan Vaivakawn huam chhung Rangvamual hnaih lamah an man.

Police-te chuan Vanrammawia hi thubuai a lo neih tawhsa bakah, jail aṭanga tlan chhuah leh rukruk thubuai an siamsak.

Vanrampana hi September 9, 2023 khan Siaha District Jail aṭangin a tlan chhuak a, September 15, 2023 khan Central Jail, Aizawla tang a ṭhianpa kan a tumlaiin, duty-te'n ringhlelin, tang tlanchhuak a ni tih finfiah a nih hnuah man a ni.

Jail aṭang hian lock up-a dah turin Zonuam Police Out Post-a duty-te'n an la a, out post thlen hnua motor aṭanga a chhuk pahin a tlan chhuak a ni.

Vanrampana hi rukruk thubuai avanga man niin, a thubuai court-in a ngaihtuahlai mek a ni. Siaha District Jail-a security wall siam mek aṭangin a tlan chhuak a, a tlanchhuak tur hi jail-a duty-ten dan tum mah se, an dang hneh lo.