Khawzawl khawpuia sorkar department hrang hrang hotute chu nimin khan deputy chief minister Tawnluia, bialtu MLA hoin DC conference hall-ah an ṭhukhawm a, department hmachhawp leh harsatnate an sawiho.
Tawnluia chuan, district thar enkawl chu thil thar a nih avangin chona tam tak a awm tih a sawi a, "Sorkarin hripui leng vangin a pawisa hmuh tur cheng vbc 3000 bawr vel a hmu lo a, vawk pul hri, ram kang, lirnghing, raltlan leh ramri buai vangin harsatna hrang hrang a tawh bawk avangin hmuh lawk lohna lamah pawisa tam tak hman a ngai ta a ni," a ti a; SEDP chu a theih ang angin nikum lam aṭangin an kalpui thu a sawi.
Head of Office kalkhawmte chu Model Code of Conduct-in a phuar hma hun tlemte chhunga hmalakna a tam thei ang ber neih a nih theih nan an office kalphungte inhrilhtawna, hma thar lakna tur inbengvarna hun atan ṭhutkhawm hi hmang turin Tawnluia chuan a chah a; "Sorkar chuan a hmuna thawktute ngaihdan leh thurawn a ngaipawimawh hle a ni," a ti.
Meeting-ah hian District Civil Supplies Office, District Fisheries Development Office, Public Health Engineering office-te hnen aṭangin an hmalakna, hmachhawp leh an harsatnate ngaihthlak a ni a, Khawzawl SP office aṭangin internet chungchanga harsatna tarlan niin, DC Office aṭangin an hmalakna leh chetvelna langsar zual ngaihthlak a ni bawk.