CM-in Police Sports Meet a hawng
Chief minister Zoramthanga chuan nimin khan Rajiv Gandhi Stadium, Mualpuiah XXI Mizoram Police Sports Meet, 2023 a hawng a; Parade Contingent 14-te chibai bukna a chhanglet.
Zoramthanga chuan, Police Sports Meet chu police-te tana taksa leh rilru intuaihriamna hun pawimawh a nih thu a sawi a, "Police-te chu rilru leh taksa hrisel nei reng tura ngaih in ni a, taksa leh rilru a hrisel ṭhat loh chuan kan hnathawhna lam a tibahlah ṭhin. Tunlaiah ruihtheihthilin kan ṭhalaite a tibuai nasain, kan police ṭhenkhatte ngei pawh a tihbuai zingah an tel hial ang. Heng thil ṭha lo lakah hian hnehtu nih tum tlat ang che u," a ti.
Tun hnaia buaina leh harsatna chi hrang hrang lo awm ṭhin lakah police-ten chhuanawm takin hna an thawk tih sawiin Chief Minister chuan, "Ralthuam tawlh rukna te, drugs tawlh rukna te leh smuggling chi hrang hrangin min chim a, heng thil ṭha lo che velte laka huaisen taka inhmalakna hi kan chhuang hle a ni. In ngaihtuahnate fim taka hmangin, huaisen a hunah huaisen takin, dawhtheih a hunah dawhthei takin, zaidam a hunah zaidam takin ram dang mite tana entawn tlak police ṭha nih zel turin ka ngen che u a ni," a ti a; Mizoram chu remna leh muanna entirtu ram, state entawn tlaka awmtir zel tura thawk turin a sawm.
DGP Anil Shukla pawhin thu sawiin, Mizoram police-ten sports huangah India ram huapin hlawhtlinna an lo chan fo tawh thu te, police-ten ṭha taka an hna an thawh theih nan rilru leh taksa hrisel an neih a ṭul avangin sports hi police-te thuamṭhatna pawimawh tak pakhat a nih thu a sawi.
XXI Mizoram Police Sports Meet, 2023 ah hian police infiammi 1,107 an tel a, contingent 12-ah inṭhenin, discipline 18-ah inelna an nei dawn a ni. Sports meet hian Seprember 22, 2023 thleng a awh ang.
Mizoram Police Sports Meet hi kum 1987 aṭang khan rokhawlhna a awm loh chuan kum tin neih ṭhin a ni a, kumin hi a ṭum 21-na a ni.