Ruihtheih thila inthiarfihlim turin chah

Aizawl North College chuan nimin khan Vanpa Hall-ah Annual College Week vawi 34-na kharna an hmang a; minister R Lalzirliana'n a hmanpui a, ruihtheih thil laka inthiarfihlim turin zirlaite a chah.

R Lalzirliana chuan, zirlaite chu college week-a an thiamthil a lantirte chu college an chhuahsan hnuah pawh chhawr ṭangkai zel turin a chah a, "Thiamthil nei ṭha te din chhuahna khawvelah kan awm mek a, chuvangin in zirlai te thlauhthla si loin in zirlai piahlamah pawh thiamna um zel ang che u," a ti.

Ruihtheihthil laka inthiarfihlim tura zirlaite chahin Minister chuan, "Mahni phak tawka inpekna tak tak rilru nen rim taka zir a, ti hram hram ṭhin chu kan ram tana malsawmna a ni a, kan ramin hma lam kan pan zel theih nan chutiang ang zirlai chu kan mamawh a ni," a ti a; zirna leh culture chu thil kalkawp tlat a nih avangin education tluantling chuan culture lam zirna a keng telṭhin tih a sawi.

Art & Culture Minister hian Aizawl North College-a Zoawi Cultural Club hnenah an mamawh phuhruk nan Rs 2000 a pe.

Aizawl North College-ah hian thawktu 37 leh zirlai 1,250 an awm a; week chhung hian infiamna chi hrang hrangah inelin, overall champion chu Blue House an ni.