Champhai South bialtu MLA TJ Lalnuntluanga, minister of state chuan nimin khan Champhai Venglai Community Hall-ah Champhai district-a high school leh higher secondary school zirlaite tana hmalam hun kawhhmuhna leh hna hrang hrang chungchang inzirtirna hunpui ‘Career Mela’ a hawng a, ‘Career Mela 2023 Resource Booklet’ a tlangzarh nghal.
TJ Lalnuntluanga chuan, khawvel changkang chho zelah Mizoramah pawh job opportunity thar ṭha tak tak a awm tawh tih a sawi a, "Zirlaite'n officer hna leh hna lian danga kan ngaihte mai piah lamah, mahni tui zawng leh thiam zawng lam ngaihtuaha rilru nei taka ke pen a pawimawh. Mizote chu ṭawngah kan chak loh ṭhin avangin kan nih turte kan thleng phak lo fo ṭhin, " a ti a, zirlaite chu english, hindi leh ṭawng dangte zir nachang hre turin a chah.
Career Mela chu Champhai district zirna tih hmasawnna kawnga bulṭanna chauh a nih thu sawiin Minister chuan, Planning & Programme Implementation department-te nen ṭangkawpin zau zawka hmalak chhoh tum mek a nih thu a sawi bawk.
He hunah hian Chairman district education committee chairman James Lalrinchhana, bawrhsap pawhin thu a sawi a; zirlaite chu technology leh internet hmang ṭangkaia kawng hrang hranga hmasawn tum tur leh hmathlir thui tak nei chunga ke pen turin a chah a ni.