Press tour-a kal turte vailiam

Environment, Forests & Climate Change department hmalaknain Champhai district Mizoram Journalists' Association (MJA) member pakua leh Information & Public Relations official pathum chuan nimin khan Sikkim-a Press Study Tour nei turin Mizoram an chhuahsan a, EFCC minister TJ Lalnuntluanga’n CHANEM tualzawl aṭangin a vailiam.

TJ Lalnuntluanga chuan, Sikkim Press Study Tour chu environment humhalh leh siamṭhat kawnga hmalakna kal zelah sorkar leh khawtlang tha ti chak tu a nih ngei a beisei thu a sawi a, "Khawvel changkang chho zelah hmasawnna hrang hrang leh environment humhalh kan kalkawptir thiam zel a ṭul," a ti.

Champhai leh a chhehvelah Nature Learning Centre, Botanical Gardens te pawh ruahman chhoh zel a nih thu sawiin Minister chuan, "Tourism lam hmasawnna turin sorkar laipui scheme - Swadesh Darshan kaltlangin Tlangsamah Project kalpui tum a ni," a ti bawk.

Press Study Tour-a kalte hian Sikkim-a ICAR-National Research Centre for Orchids, GB Pant National Institute of Himalayan Institute, Kanchendzonga National Park te an tlawh dawn a, sorkarin hma a lak dante an zir dawn a ni.