KHAWTHLIR

Thisen pe

Mizoram Pradesh BJP Ṭhalaite chuan nimin khan an office-ah prime minister Narendra Modi Birthday puala Seva Pakhwada Week (mipui vantlang tana luanchhuahna) neih mek pualin blood donation camp an buatsaih a, Civil Hospital, Aizawl tan thisen unit 25 an pe.

Ṭanpuina hlan

Mizoram Ex- Servicemen Association hnuaia Mizoram Veteran Multipurpose Cooperative Society chuan nimin khan Central YMA kutah Manipur buaina avanga Zohnahthlak harsatna tawkte ṭanpuina atan Rs.3,00,000 an hlan. Zohnahthlakte ṭanpuina atan hian CYMA chuan tunhnai khan Aizawl Hrangkhawl Welfare hnen aṭangin Rs. 15,000 leh Hrangkhawl Welfare, Kamalacherra, Tripura hnen aṭangin Rs.49,000 an dawng bawk.

EVM leh VVPAT hman dan zir

Lawnglai DC conference hall-ah nimin khan kumina MLA inthlanpui neih tur pualin Sector Magistrate-te tan EVM leh VVPAT hman dan inzirtirna buatsaih a ni a; district election officer H Lalhmingthanga, bawrhsapin a hmanpui. Lawngtlai district-ah hian electoral roll ennawn mekah voter 89,749 awmin, mipa 44,846 leh hmeichhia 44,903 an ni.

Minister-in tlangzarh

Social Welfare & Tribal Affairs minister Lalrinawma chuan nimin khan a pisaah naupang kum 6 hnuailamte puala siam Early Childhood Care and Education curriculum thar, ‘Thiam bul ṭanna bu’ a tlangzarh.

Hriatthiamna ngen

PHE dept. chuan hriattirna ti chhuakin GAWSS Phase-II, Dihmunzawl tui pump-na electric khawl lian pakhat chu September 15, 2023 tlai lam khan a chhiat thu an tarlang a, "Siamṭha turin ngawrh takin hmalak nghal a ni. Hun eng emaw ti chhung chu phase-II aṭanga tui pump-na electric khawl lian E.M-I hmang hian tui pump theih a ni dawn lo. Tui sem lamah pawh harsatna a awm rih deuh dawn avangin mipuite hriatthiamna kan ngen," an ti.