Vairengte checkgate-ah hripui vei Mi pasarih hmuh chhuah a ni tawh
August 10, Thawhṭanni tlai dar 3 vel aṭang khan Assam state aṭanga Vairengte checkgate paltlang tur lirthei khalhtu, handyman leh an mi phurhte chu Rapid Antigen Test (RAT) hmangin Covid-19 an vei leh vei loh endik ṭan a ni a; nimin tlai dar 5 thleng khan hripui vei mi pasarih hmuh chhuah a ni tawh.
Vairengteah hian lirtheia chuangte endik an nih rualin, checkgate-a duty Police leh Excise & Narcotics duty-te pawh endik nghal a ni. Nimin tlai dar 5 thlenga Covid-19 vei hmuh chhuah mi pasarih zinga pakhat chu checkgate-a duty, Mizo mipa, kum 37 mi a ni a, mi dang paruk chu lirthei enkawltu hnam dang an ni.
Mizorama lut tur lirtheia chuangte Rapid Antigen Test hmanga endik zel tur a nih avang hian Kolasib district magistrate Dr H Lalthlangliana chuan August 10 khan Vairengte police checkgate leh Vairengte kawng thar auto-rickshaw stand inkar chu tlawhpawh phal loh, containment zone-ah a puang nghal a ni.