Inthlan tur avangin task force-ah VC-in hma an lak a rem tawh lo

Kolasib district magistrate Dr H Lalthlangliana chuan, VC inthlan puan a nih tawh avang leh Model Code of Conduct hman a nih tawh avangin, village task force hminga political leader (VC)-te'n hma an lak zel a rem tawh loh thu a puang a; VTF-a mawhphurhna chu YMA lamin an kengkawh zui tura beisei a nih thu a tarlang.

August 10, Thawhṭanni khan Kolasib District Magistrate chuan order tichhuakin, VTF hminga political leader (VC)-te'n hma an lak zel a rem tawh loh thu a puang a, "YMA member-te hi VTF-ah member ṭangkai tak an ni a. Chuvangin, inthlan zawh a nih hma chu veng/khaw tin branch YMA-te'n VTF mawhphurhna mahni veng/khuaah lo kengkawh zui tura beisei an ni... Inthlan zawhah VTF kal zel dan tur chu ngaihtuah a ni ang," a ti.

Kolasib District Ma­gistrate chuan, YMA kaih­hruainain VTF hmalaknaa senso ṭul ang pawh VTF pawisa an hman zui theih a nih tur thu leh, chu chu YMA Sub-Hqrs., Kolasib-in an enpui tur thu a tarlang bawk.

Hetih lai hian, Saitual district magistrate VL Hruaizela Khiangte hoa August 10 vêka District Task Force, VTF, VC leh YMA hruaitute ṭhutkhawmnaah, VC inthlan puan a nih tawh avang­in Saitual district khaw hrang hrangah VTF vice chairman-te'n VTF chairman mawhphurhna la rih se, tiin an rêl a ni.

Sorkar hotute hnen aṭanga thu dawn danin, village task force leh Aizawl­a local task force-te chu State Task Force thurel anga district magistrate (DC)-te'n an district ṭheuhah order an chhuah anga din a ni. Order ang chuan, task force-a chairman chu VC/LC president/chairman an ni ang a, secretary chu VC/LC secretary an ni ang, tih a ni a; vice chairman erawh chu YMA president an ni.