Daihzai taka sum hman dan tur sawiho Sawi ang em emin sum a harsa lo: CM

Nimin khan chief minister Lal Thanhawla hoin Cabinet Room-ah High Level Meeting on Financial Resources an ṭhukhawm a, Mizoram sum neih ang angte a daihzai thei ang bera hman a nih theih dan tur an sawiho. CM chuan, Mizoram sum harsatna chu sawi ang em ema nasa a ni lo tih a sawi.

Chief Minister chuan, "Sum harsat chungchanga kan insawi ṭhaih ṭhin hian mipuite rilruah sum inrenchem pawimawhna a siam a, a lawmawm hle. Sum harsatna chu sorkar hian a nei ngei a, amaherawhchu, kan sawi ang em em hi chu a ni lo. A ṭulna azirin hman tur chu a awm reng a ni," a ti.

Meeting-a tarlan danin, Finance minister Lalsawta hmalaknain sorkarin leibá a neihte nasa taka tihtlem a ni tawh a, K-Deposit lamah pawh harsatna a tlem sawt hle. State dangte nena tehkhin chuan, Mizoram dinhmun chu a ṭha ber zinga mi a ni tawh.

NITI Aayog-in state tinte sum hmuh dan kalphung a thlak danglam avang leh 14th Finance Commission-in sum hmuh tur a bituk chungchangte bakah, state sorkarin sum a hmuh dan turte meeting-ah hian a zir chian a ni a; sorkarin sum a neihte chu a ṭha thei ang bera tihpun (invest) a ṭul thu sawi lan a ni.

Kut hnathawktute thar chhuah tipung tur leh a hlâwkna tél tura sorkar leh mimal thawhho theih dan tur an thlirho a, "Mizorama thlai thar tam zawkte hi a to chhan ber chu a thar chhuah nana sum sen a san vang a ni. Link road laih hnem a pawimawh hle a ni," an ti a; thil thar chhuahte chu ram páwna thawn chhuah tham ni turin buaipui bik tur thlan thiam a ngaih thu an sawi.