Chief minister Lalduhoma chuan, village council term chungchang chu sorkar thuneihna a nih thu leh VC term tihtawi vanga court-a sorkar khin tum an awm avangin buaina tur a awm loh thu leh, February 2025 thla chawhnu lamah VC inthlan buatsaih tura inruahman mek a nih thu a sawi.
CM Lalduhoma hian nimin khan Lungleia ZPM pisaah thu sawiin, nakkum 2025 February thla chawhnu lamah VC inthlan buatsaih tura ruahman mek a nih thu a sawi a, "VC term hi Covid avang khan pawhsei a ni tawh. A ṭul hunah sorkarin a pawt seiin a pawt tawi thei. Hei hi sorkar thuneihna a ni a, tun hma pawhin pawh sei leh pawh tawite a lo awm tawh ṭhin. Tunah court-ah kan khing dawn tih thâwmte kan hria a, an buai peih chuan min khing se, keini tan buaina tur a awm hran lo," a ti.
February thlaah budget session neih ṭhin a nih thu leh Parliament session pawh tih hma a nih tlangpui tawh thu sawiin Lalduhoma chuan, "Hei vang hian a tlai berah February thla tawp lamah session kan ṭan loh chuan kan tlai kan hlau," a ti a, chu'ngte ngaihtuah chuan budget session hmaa inthlan a ṭul thu a sawi.
Lalduhoma chuan, February thlaah VC thlan a nih chuan financial year thar (April) aṭangin VC tharte'n hna an thawk thei dawn tih sawiin, "Financial year thar hi VC hluite'n an kai khan thil buaithlak a awm theih avangin hetiang ruahmanna hi siam a ni. VC tharah chuan kalphung thara kal turin kan duh dawn a ni," a ti.
CM Lalduhoma chuan, sorkarin kalphung ṭha nei turin kawng tam takah hma a la mek tih sawiin, "Kalphung ṭha lo tam tak hi vawi leh khata siam ṭhat zung zung theih lohte pawh a awm a, mahse, sorkarin chak takin hma a la chho zel a ni," a ti bawk.
