MANGṬHA MAI LE PU KL LIANA

Kumpuisul pawh a vei em lo a, min dem lo vang chu maw... Zûnphur thingtinpâr leh khawtlang lii liai han hawi vel ila ṭahzai min rel tir e. 

Ka dawnin suihlung a leng e,

Khuarei ka ngai ngam lo ve.

Pu KL Liana a boral ta tih hriat zet zawng khawtlang hi a ngui ruai mai. A finna te, a thiam leh a diknate kan lo chhim ve theihna Vanglaini chanchinbu a a sulhnu tel tawh lo turte hian lung a tileng a, Mizoram tân chânna nasa tak a va ni em! A article te kha ka chhiar hnuah ka thlep ṭha a ka dah ṭha ṭhin.

A lehkha ziak hi han chhiar ila min tilungleng sauh sauh a, kan ṭangkai pui tur thil dan leh hrai lamah min hruai leh daih ṭhin. 

Ama in sawisak danin a sakhmelin puak ti mah suh se, mi khawngaihna ngah leh dikna duh mi a nihna te hian ngainat leh ngaihsan a hlawh a ni. 

Mi lungleng thei tak a niin a hriat a, a boral thu ka hriat ve leh,

“Fur leh ṭhal favang lo thleng tur hi, 

Kei ka tan senlai nau ang ṭahna;

Thapui nang ngai reng renga 

khua romei an, 

Ka zâm nang e, 

In ṭuanna tlang bawmah hian”

tih hla hi ka rilruah a lo lang a. Nula leh tlangval inngaihzawnna hla niin lang mahse sakhmelpawh ka t awn loh anka ka biak loh mah nise a Reiektlang leh a chhawrthlapui te kha ka ngaih­tuah a, a tel lova favang a lo thleng leh tur te, a Reiek tlang romeiin a bawh paw leh chêk tur te, Khuangchawithla eng mawi tak lo her chhuak leh turte hi  a neitu ber a awm tak si lohah chuan tuin nge fak mawi ta ang? 

Thlaeng ka hmuh te hian amah ka hre chhuak ṭhin, a chhan chu a sawi eng mawi thiam bik em ṭhin a ni. (A chhung­ten lo haw lo se) 

Tuikual veng kawng sira khâmpang par eng vul chûk ṭhin te kha kei nin kan en liam mai mai laiin a ni chuan a sawi vul mawi thiam teh asin. Hetianga a talent neih ṭhatzia te kha a liam pui vek ta mai si. 

Eng pawhnise, ‘He lei hi chatuan ram a tling lo, lungngai a ṭahna a ni maw Lalpa. Lawmna ten mual an liam ta e, hlimlai par ang a chuai’ kan ti leh ṭhin zawng a nih hi. 

Ngai chung zelin mangṭha mai le Pu KL.