Ka Pu Vawma tui a ni, i in ngam leh in la, i dâwt ngam leh dâwt la...

"Ka Pu Vawm vawma tui a ni, i in ngam leh in la, i dâwt ngam leh dâwt la," tia Zawngtein a Pu Vawma tui ven hla a lo sa kha a ni; ka ngaihtuah chhuah vawiin chu.

Ṭhiante damlo (zai ngai) buaipuiin, Aizawl Civil Hospital Surgery Ward leh a chhehvel ka kartawn sek a. Ka hriatna a sual a nih pawhin unau thawnthu sawi mah a dang ṭhin ni a, an sawi kha.

Pu Vawma zawng, a phunglungin a tawrawt em a, Sakhi leh Sazuk te khan "A tui thuhruk" kha tlan ngam loin, an kian san a. Kian san turin Pu Vawma tui a nih thu Zawngte-in a hrilh hmasa kher kher a nih kha; an kiansanna chuan an sahimna a va thlen chiang e!

Pu Keia erawh, mi tui duh lai a nih thu hrilh a nih lawm lawm hnu pawha a awih duh lohna chuan, kâr loah Pu Vawma nen inbakkaihin famkhua an lawî a. Pu Vawma tui a dâwt lai kha chuan a tuiin, puar leh hlimpui pawh a inti viau mahna, a hlim laini a pamhmai lua emai.

Pu Vawma tui lo tlan ve zeuh zeuh tawh, chu Tuikhur tlantute chunga lukhâwng buaipuiawm takin a vuaklet nek dante chhûtin, Khuaibu la ang mai kan ngaihtuahna te chu a vûng deuh chûr ni te hian ka hria, vawiin chu.

“A thihpui dawn tak ngial, a hnuhin kan hnuklut a ni ber,” tia a sawi mek a fapa chu Mizoram Police ṭanglai a ni. Chu nu chuan, a piah khuma mi chu kawk zauh pahin, ‘anni phei saw chu, Thin (liver) ṭawn/ phuar tawh a ni e, an ti,’ a ti.

Piah leh deuh a mi chu a zangthal zawnga a mu chung pawhin a pum chu a puar huar a, chung damlote khum bula damdawi bawma damdawite chu - Heptral 400mg (Ademetionine), Udiliv 300 (Ursodeoxycholic Acid), Liveril Forte, Sylimarin leh a dang dangte a ni tih ka chhinchhiah ru thei a. An damdawi ei a inang deuh vek mai chu thawktu zinga mi kan nau, nurse pakhat chu thil awmzia ka zawt ta a.

Min chhanna chuan ‘Hreihâ rawh lin mal chunga tla,’ ang maiin a ni mi deh ni. “Dan hnuaia Pu Vawma tui zawrh a nih hnu hian, khum hi kan indaih ngai lo, hetiang ho case hi chu admit tur an awm mar reng, damdawi Inah rei kan awm tir thei lo zawk,” a ti. Chu chu private Hospital pakhat a mi mai a ni.

Sap ho paw’n tui pawlh lohin an in, tiin ka’n vau tui tlak ve ang pawp pawp a. Anni thil te chu pawlhdal (dilute) sa a ni, tih lam erawh kan phungthlu pha thlawt lo ni te’n a lang ṭhin e.

Zingkar LPS leh Zonet chanchinthar han thlir ila, casualty report mawlh mai hian rilru a tihah. Police hotu pakhat chuan, “Pu Vawma tui zawrh a nih hnu hian, khawlaiah buaina emaw, accident thleng emaw a pun belh teh thut lo, chu aia kan indaih loh zawkna ni ta ber chu, family case, chhungkuaa buaina chawk chhuak
ṭhinte hi a ni, kan buaipui daih thung,” a ti chuan lang lo lamah Kristian chhungkuaa harsatna a thlen dan te chu min thlir tel tir a.

“Ka Pu Vawma tui a ni, i in ngam leh in la, i dawt ngam leh dawt la..,” kan intih mai loh nakah; Liquor Card nei ve lo te paw’n an thâl ve theih tuikhur a tling peu puau si a lawm le. Venghimtu kan police hotu liante chuan thuchhuah te an siam thul, hun reilo te chhungin Pu Vawma tui tlan vangin mi 100 chuang an boralna karah, ‘Râl’ hmaa nunna hlante erawh pathum chauh zuk nia! Ka Pu Vawma tui tak hi chu...

- Lalnunsiama Pautu