Hlawh nei lo model in ti maw!

Tun hma Mizotena kan ngaihsan ṭhin an sawi chu sipai leh driver an ni a, khawilo zinnaah pawh driver ho chu an bawr luih a, an luck viau zel. Chutiang deuh bawkin sipai nih kha inchhuanna tham a ni a, sipai ṭhian emaw sipai bialpa nei nula kha chu an in sawi thei viau ṭhin a ni.

Information Tech-nology khawvelah kan cheng tawh a, sipai leh driver ngaih-san hun pawh a liam tawh. Tunlai ṭhangtharte chuan facebook, whatsapp leh instagram an ti a, thu inthawn nan a
ṭangkai a, thlalak leh video clip thlengin awlsam takin kan in thawn zung zung thei tawh a ni.

Hetianga khawvela kan chen tak hnu hi chuan cameraman an rawn inlar a, hengho hi kan tleirawlte leh rawltharten an zui dul dul a. World Bank road an duh tawk tawh lo a, picnic spot leh hmun pilril leh nuam lai deuh kan in hriat siak ta huai huai mai le.

Kan rawltharte hi an nalh a, an vun leh an sam te pawh a nalh tawh khawp mai. Hetiang an nih piah lamah hian came-raman-in uluk taka an thla an han lak sak takah chuan a taka ṭha lem lote pawh an lang nalh ve vur a.

Chutianga thlalak nalh han nei ve ta chuan facebook leh whatsapp lehah te an han post nghal thuai a. A caption atan "Ka chhe thlawt, ka van chhe tak" an ti a, chhia an intih vanga an thlalak anmahni ngeiin rawn tlangzarh ngawt thu lah awm suh.

Chutianga mahni lan ṭhatna rawn pho chhuak ve ta chu an
ṭhianten an lo hrethiam nghal thuai a, an like sak a, an lo fak arek lo chauh a, thlalak neitute chuan nuam an ti viau a, thlalak dang ṭha leh nalh zawk neih leh thuai an chak a; a rei hnu phei chuan khum lai zawlah a itawm thei ang bera thlalak neih hial te pawh an duh ta ṭhin a. Hei hian mi tam tak nun a tichhia a, a tichhe mek zel bawk a ni.

Hetianga an vahvel-naah hian thlalak an in neih nalh siak ta a, camera hmaah thui tak tak an inhlim a, a tawpah chuan an in hlim mualpho ta viau a. Ṭhenawm khaw-vengten an melh hrek hrek hnuah khawtlang thinhrik an ni leh a, anmahni ngei an in hmuh chhuah meuh chuan khua a lo tlai tawh hle dawn a ni.

Ka han sawi tum tak ber chu nu leh pate hian kan fate tui zawng hi hriat pui ila, mipa te pawh an bang chuang lo a nia; a him chinah kan fate i awm tir ang u tih mai te hi a ni.

Mizoram zim te ah kan cheng a, heti zat model kan nei tawh a, modelling lama kal hi intih hmuh vak chi pawh a ni lo. Tun hma kum 10 kal ta khan model lamah heti takin kan tui lo; chuvangin tuna kan fb model ho hian talent dang kan nei tih an hriat a ngai.

- Ramhmangaiha