Tlaizawng kung pakhat i tluk ve em?
Kum lama upa deuh zawkte chuan an vanglai an ngai ṭhin a, an vanglai chanchin sawi tur an ngah ṭhin khawp mai. Kan sikul kawmthlang kha huan a ni a, thing lian pui pui a ding thluah a. He sikul huan thing sang pui pui zinga sikul hnaih ber Tlaizawng kung tar lam tawh, a zar lian lam phei chu ban phak maia awm ṭhin kha a lo va hlu em aw!
October thla tawp lam
aṭangin a hnah a tlakawlh ṭan a, november thla tawpah meuh chuan a hnah tlakawlh faiin a lo kuhmum ṭan a. December thla laihawl velah chuan a lo vul mawi viau tawh ṭhin. Amah siamtu chung Pathian ropuizia leh remhriatzia tarlangin par tlan nungcha rinrengten a par zu thlum chu inhnangfak nan an hmang ṭhin a, hlim takin khuanu ruat ruai ropui an kilho ṭhin a ni.
Kum thar sikul ṭan hun a lo thlen meuh chuan a rah sen a lo uai fur tawh a, a hnah pawh lo chawrin a lo hring deuh hlup tawh ṭhin. Reiloteah a rahte chu a hmin sen tuar a, naupang kam hlei deuhte phei chuan a rah hmin ṭha deuhte chu an ei mai ṭhin.
Khaw ṭhal vanglai March leh April thla a lo ni a, thing dang tam zawk hnah a tlak kawlh laiin he Tlaizawng kung hi chu a hnah hrin mawi vanglai a lo ni a. Ṭhal vaekchar kan hman lai leh thing dang tam zawkte hnah tlak kawlh laiin hnah hring mawi tak chhuahin sikul naupang zathum zali rual tan boruak thianghlim a pe chhuak reng ṭhin a ni.
May - June a lo ni a, fur pui inṭanin ṭo ruah leh ruah thimpui te dodaiin sikul building tana thlipui lo dangtu ṭha tak a ni. Fur ruahtuiin a len bo mai tur leilung hang ṭhate a lo hamtang a, lei hnuaiah theih tawpa tui a khawl avangin sikul huan mawnga 'Pawhhawn' tuikhur pawh a fur a ṭhalin a kang loh phah a; a thil ṭha tih tam tak avang hian siamtu lung pawh a dum zo ngei ang le.
Kan headmaster-in class la mawlh mawlh mahse naupangho thawm hriaa class aṭanga tlan chhuak a, sikul huan thingkunga pawnto sava um darh tumtu naupangho khapa; savate chu an tana hram mawi an nihzia a hrilh lai te kha aw. Kan headmaster khan khuanu duan he khawvel mawina chi hrang hrang hlutna kha a lo va man chiang awm ve le!
Engpawh ni se siamtu chung Pathian hian kan nihna ang anga amah chawimawi tur leh a ropuina tilang turin min siam a. A thil siam chi tinrengte hian inring tawnin he khawvel hi kan luah a, mahse engmah hian chatuan a daih dawn si lo.
He hringnun hi a la ral dawn a, chumi hma chuan tu emaw talin an hriat reng tlak thil pakhat tal kan ti ve thei ang em? Tu chhuan hial neite pawh hian he Tlaizawng kung pawh hi kan tluk meuh lo thei a nia - tu emaw tan mi ṭangkai i ni ve tawh ngai em? I han inngaihtuah chiang teh ang u.
- Chawngthantluanga