Civil Hospital-a damlo ka awmpui ve khan....

Aizawl Civil Hospital hi an va'n indaih lo tak. An indaih mawlh lo, staff nurse te an hah chu thuhran, damlo na tak takte hi a ni ka lainat ni, tiin, bul ka’n ṭan hmasa teh tâwng ang e.

Hmanni lawk khan kan u pakhat chuan zaipui tawkin, a bula mite pawh chuti tho. Khatia an zai dawn khan zaina hmun Operation Theatre (OT) a mamawh tur zawng zawng leh, a hnulama mamawh tur ang chi te min leilâwk tir nghek a. Canteen aṭangin kan inkhai chhuak lawih mai!

Inhlawhfa chhungkua te tana ban phâk, Aizawl Civil Hospital hlutna hi a sang em em. Khami zan khan kan u damlo an zai chu ka awmpui ve a. Dan pangngaia chhun lama an zai te ni lo, rikrum thila an zai te chu zan dar 8:00 ah te a hnu lamah te an rawn zâwn lut hlawk hlawk bawk a.

Heng, lo buaipuia ward/room khat (khum 16 awmna) vil tur hian staff nurse pakhat chiah a duty nia le!, a va'n ṭul tak. A han vîn vei hlak thinte chu a tirah chuan ngei ru deuh mah ila. Ka va’n hrethiam leh si e.

Male surgical ward tih takah damlo tam zawkmah chuan zun bawm (urine bag) vuahin an khum tlangah chuan an khai uai fur a. Thisenchaw kan tih mai (Dextrose/ Drip) bur hnih khai rual ta fer fur te, venflon vuaha eng damdawi dawi emaw an kap lut zawih zawih te chu ka thlir reng a, accident tawk hliam rapthlak pui pui te, thâwkna dâwt vuah sak chawp te leh, oxygen nen pawha thaw meng kal kâwk kâwk te, a nâ a ni tih hriat ngawih ngawih, ring zawi nghiaí chunga lehlam thle bal, mit meng val kiû kiau te an ni, he ward a mi te hi.

An zai hma zan dar 10 vel
aṭangin engmah ei an phal tawh lohte an nih vangin Dextrose - NS, RL, DNS, D-10 leh 5 etc. te chu an inchhawp hnem hlawm ngang mai. Khami zan pawh khàn an khai malh malh hlawm a.

A tuk a lo ni a. Nimin maia zaite chu khum indaih loh vang leh emergency tam vang te, casualty/OPD lama mite suan luh tur an tam vangtein chhuah tir ngei an ṭul ta mai si nia! Private Hospital te chu ni se zawng, an la in-uibet hram emaw a ni tal ang, ti te’n zeldin thu ka bawl rauh rauh va.

Nurse pakhat chuan, chhuah tir la ni lo ula chuan in drip lei zawng zawngte hi khai zawh vek tur asin le, a ti, (bur 16 vel khai lohin a chuang reng a). Mahse, puanthuah tel chu thil hmanhmawh thlak a ni tih an chetvel dan aṭang chuan a lang reng. Nurse zirlaite chuan chawhma te chu han puibawm ve bawk mah se, an awl hman chuang lo, mawng an hung a nih pawhin an kut a awl chuang lo.

Damlo chhuah ngai ta si te chu a ni; ka lainat tak em em. A ṭhen chu an zakah dar-a do vin, zawi muanga pen chuahpui an la ngai. Chhuak tura an tih pakhat chu, a mutna aṭanga atuna tun thawh chawp la ngai a ni. Nurse duty te mawlh khan hun lo chu an tih te ka ring ve a. Mahse, chutianga an ti chu an hotute thu a ni a. An hotute chuan chutianga ti tura an tih chhan chu damlo an tam vang leh, Hospital-in a zawh loh vanga ti an ni tih pawh a lang reng si.

‘Falkawn Referral Hospital lama department panga vel an sawn phei khan thawktu (staff nurse) te indaih lohna a ti zual em em a ni,’ tia ‘Sister’ pakhatin mi hrilh chu, reilo te atan pawha han awih loh pui zawk hman pawh a ni lo. Thawktu an sawn phei a, damlo an insawn phei lem chuang si lo laia chu a ni; an ṭulna leh indaih lohna chu.

An damdawi lei sa te chu return leh theih a nih tawh loh avangin an hman bang ang angte chu, a lo lut tharte an han inpe ve leh chhawng a. Nurse duty chuan, "saw mi khuma mi te sawn damdawi leina leh drip khai tur leina an neih loh thu nichin khan an sawi," a tih aw ri te chu cham hlen turin beng dawh mar hman hauh lo mah ila, chu thil chuan mit tui a hruai chhuak lek lek.

In check up leh hun atan kar thum hnu emaw, thla khat hnuah an ti te chuan Marpara, Saiphai, Zamuang, Zawlsei, Sangau, Sialhawk leh Biate khaw damlo tante chuan lungngaihna a va'n thuah hnih tak.

An khaw lamah a haw rih a nih pawhin hna hrâm thawk tura beisei chi a ni lo va. Thlen In zawng chawp titiha Aizawla damlohna vanga tlulutte tan takte chuan a nia an rilruin ar bo zawng dawn bik riauva ka hriat. Zanriah vawi khat bar pawh inthlahrun a nat duh vei nen. Dinhmunte hi a inang hlawm si lo a, thei leh thei loin Ṭhal chhunga an la siam ṭhat rih chuan si loh; khaw kâr kawng khawkrawk lutukah insawh haw nghawng nghawng turin an inbuatsaih a ngai leh ta poh chu a ni si a le(h).

Aizawl Civil Hospital pawi­mawhna hi a ban phaktu leh a chhawr na puia ber te chu thlakip hlawh nei ve lo chhungkuate tho tho an ni. An hmarcha leh vaihlo, meihawl thar tam kumte chu ni se, thu dang. Khawpui lailî a bawlhhlawh bawm lian tak hûng ang lek chuan i chhuah tawh lo ang u. Tum vang reng ni lo, dam loh thulhah a panna private car nei ve lote tan a luhaithlak ṭhin e mai.

- Zobiakvela (Masena)