Mizote leh hawihhawmna

Kan ṭhian ṭha leh kan hmelhriat te, kan chhung leh khatte bakah min duhsak theitu turte lakah chuan Mizote hi kan hawihhawm viau zel a, biak pawh kan nuam viau. Inthlan dawn hnaihah phei chuan a tu a te pawh hi an ṭha em em vek a, biak nuam tak an ni. Mahse, inthlan a han zo chiah chu biak hleih theih pawh an ni lo. Inthlannaah an han tlin lehlek phei chuana melh pawh min melh ṭha peih mang lo a ni. Kan mizia hi a lo mak ṭhin zawng teh e.

Mizote hi pawn-langah ringawt hian kan ṭha ni mai hian a lang. Ṭhenkhat phei hi chu Pathian biak inkhawm lai chauhin an ṭha niin a lang. Inkhawm leh ṭawng-
ṭai rualnaah a peih rei ber ber an ni.

Sawmapakhat pawh kan eiruk sum aṭanga pek kan hreh tawh hek lo, a pe tam ber kan nih theih chuan kan lawm tawk viau. Kan Pathian hi lawm ang em tih hi i ngaihtuah tlang teh ang u.

Aizawlah hian zirna avang leh hna avangte mi tam tak anmahni chauhin leh an ṭhiante nen in in luah ṭawmin an awm ṭhin a. In ruak luah tur hmuh mai pawh a harsa ṭhin.

Kei pawh zirna avangin kum nga kal ta aṭang khan Aizawlah hian ṭhianteho in luah finin ka awm ve a, ka lawm hle. A hnu kum hnih hnu velah in ruak luah tur ka zawng ve ta a, Mizo mipuite biak an harzia leh an hawihhawm lohzia ka han hmu chu mak ka ti hle mai. A pawnlangin kan lo tlawmngai ṭhin ni te hian ka hre rum rum. Bul deuh tak leh thinrim awka ni mai hian mi an chhang deuh hlawm fur mai zu nia!

Pawnlang hawih-hawmna chauh ni lovin chhungril tak tak hawihhawmna hi i nei ang u. Mi dangte tan biak nuam leh dawr nuam tak nih i tum bawk ang u. Hawihhawmna te zawng pawisaa lei ngai pawh a ni lo a, hekna leh hlohna lah a ni hek lo. Mihring min ti zahawm a, min ti ropuitu a ni zawk.

Kan hawihhawm-nate hian ramri kham chin leh bituk chin nei lo hram bawk se. Mi hausa leh awm-theite chunga kan hawihhawm ang bawk hian tu chungah pawh ṭhat chhuah ila, tute tan pawha nelawm leh biak nuam nih i tum tlat ang u.

Ringtu inti ve a, harhna chang a, Thla-rau Thianghlim dawng inti ve si, hawih-hawmna bik nei hrang i nih ngat chuan vanram chu i hnaih lutuk bik hian ka ring mawlh lo. Piangthar lo te nen huang khata khung tlan tur tho tho i ni ang - Beram huangah ni lovin Kel huangah.

- Nawlchunga Chinjah, Saiha