Jail tang tlanchhuak
Tunlai Mizoram titi lar tak pakhat chu 'Jail Tang Tlan chhuak' chanchin a ni a, chanchinbu leh TV mai bakah social media a luahkhat hneh hle a, ṭhenkhat chuan fiamthu nan an hmang a, ṭhenkhatin sawrkar dem nan an hmang thung.
Siaha District Jail aṭangin Vanrampana a tlanchhuak a, Mizoram chhim lam aṭang hian Aizawlah lo pheiin Central Jail-a tang lai a ṭhianpa tlawh a tum. Hei hi lo ringhlelin an lo mah a, mahse police kut aṭang hian a tlan chhuak leh a ni.
Lock-up a dah turin Zonuam Police Out Post-a dah tur ni mah se a chhuah leh a ni. Tun hnai khan Mizo police ten an man leh a, thubuai a lo neih tawh sa bakah jail aṭanga tlan chuuah leh rukruk thubuai siamsak leh a ni a, a thubuai ngaihtuah lai hian a tlan chhuak leh mai ang em tih pawh hriat a ni ta lo.
Thil awmzia chu hei hi a ni, tun ṭum chauh pawh a ni tawh lo. Mizoram jail aṭanga tlan chhuak chanchin hriat tur a tam hle a, kumin leh kum laihawla kan thu hruat lar tak pakhat pawh jail a tawt thu leh a tang leng tur chin aia tam an tang tih a nih deuh vek.
Mizoram chhunga jail te a hlui in a ṭha tawk lo tih a chiang a, chumi piah lamah chuan a enkawltu leh hnathawktu police lam an khawng tawk lo hle tihna a ni a, misual an mansa pakhatin hun rei lote chhunga a tlan chhuah khum sek mai hi zaka kun ngawih ngawihna tham a ni - misual pakhat man sa pawh hreng hleithei lo police hi mipui nunau tan thlamuanpui chi niin an lang lo.
Miṭhenkhat titi chuan heitiang hian an sawi ṭhin. Police a lut tur chuan qualification sang kher a ngai lo a, politician hoin an duhsak zawng thun leh intih lawm tawn nan an hmang nasa, tih a ni. He thil hi a tak tak a nih ngai chuan a lungchhiat thlak hle. Police te chu mipui venghim tu tur, dan leh hrai lekhawh a misualte mantu tur an nih laiin a tling leh ṭha tawk ni lem lo duhsak zawng dah nan kan hmang a nih chuan engah nge kan inchhuah mualpho pheng phung loh reng ang ni?
Tunlai hian Mizoram police ten Sports an nei mek, a hawnna huna thusawitu Chief Minister Pu Zoramthanga chuan tunlai hian Mizo ṭhalai zingah ruihhloin a tihbuai an tam thu a sawi a, heng zingah hian police leh force ho pawh an bang lo tih a sawi a, police te chu ruihhlo laka fihlim tur leh taksa hrisel nei turin a chah.
CM thusawi aṭanga a lan dan chuan police hrisel lo, mahni duhthlanna ngei ruihhlo khawih, chumi vanga taksa hrisel ta lo an tam tihna a ni. Mizo tlangval, taksa hrisel nei tura ngaihte ruihhlo vanga an vanglai a rei lo leh an tha a ṭhum hma ta hi a pawi takzet.
A pawimawh ber ta cu, engtiangin nge police chak leh huaisen kan neih ang tih a ni. A hmasa ber atan chuan police tur lak dan a dik a ngai, taksa hrisel ṭha leh chak, a tling ngeite police atan lut se a, chumite chu lehkhathiam leh fing bawkin an ho a nih ngat chuan Mizoram police te hi an chhiat ngawt nachhan tur a awm lo.
Police ṭha kan nei a nih phawt chuan misual an tawmim ang a, thilsual titute an inkiltawih ang a, mipui nunau leh mi dikte an zalen thung ang a, pawikhawihna a tlahniamin mipui vantlang nun a ralmuang bawk ang.
Tunlai thil thleng avng hian Mizoram police-te inenfiah se la, tun hma lama sulhnu ṭha leh ropui tak tak an lo neih ṭhin tawh angte an neih let leh a, mipui vantlang tana thlamuanpui awm tak an nih leh theih nan an hun tawn hi harh chhuah nan hmang mawlh teh se.
- Sanga, Aizawl