MNF insawi pâwr, Congress insawi khawngaihthlak, ZPM phur thak

Tunlai Mizoram Politics chu MNF an insawi pâwr em em a. Congress an insawi khawngaihthlak ve thung a. ZPM hi an tawngpawmg phûr em em bawk a, a ruka thlamuang leh a ruk taka hlauthawng party hi an awm a ni.

MNF INSAWI PÂWR :

Ruling Party MNF hian an thusawina hrang hrangah hian an tlin nawn leh tur thu huaisen takin an sawi. MNF hian tlin an inrin vangin an sawi a ni thei a, mipui rilru hruai beisei vang pawh a ni thei tho. MNF hian ngun takin an chhût an chhût ang a, an tlin theih dan leh an tlak theih dan hi 50-50 in an dah ang. Aizawlah hian MNF hi an nil thei, an nil vaih chuan Bial dang aṭanga tling khawp MLA neih chu a harsa ang.

Zemabawk Chief Minister Bialah ber Local Council inthlanah an Nil tlat a, a pawi ta a ni. MNF hi party lian leh Ruling mêk an nihna zawnah chuan tling leh tura kan beisei nen Zemabawkah an mualpho. Chu chu thil thleng pakhat a nih theih laiin; hman ni khan Salem Venga Local Council inthlan khan MNF an chak lo leh tlat. Salem Veng mai ni lovin MNF kulhpui MNF Returnee awmna Luangmualah an chak lo a, hengah hian ZPM hlir an chak avangin ZPM hian MNF hi an zuam.

He boruak hrethiam MNF hian mipui confidence an neih let theihna turin "Kan boruak a ṭha, kan tling nawn dawn" an ti a, an tling nawn tak tak lo ang tih pawh sawi theih a ni lo. Tunah hi chuan MNF mamawh chu an mipuite Party danga an kal lohna tura insawi awihawm, insawi rinawm an mamawh lai a ni. MNF tan tlin nawn theihna chance a la sang.

CONGRESS INSAWI KHAWNGAIHTHLAK :

Congress hi Party lian ber anga inchhal ṭhin an ni. Mizorama rorel rei ber an ni bawk a, Mizorama politician hausa zinga 70% vêl hi Congress an ni ang, an ti ṭhin. Tunlai chu Congress hian insawi khawngaihthlak an ching a, 'Mi tlawm tak tak, engmah chhuan tur nei lo kan ni' tiin an han campaign vel a, lém ang der mai an ni.

Congress hi chu dik takin Mizorama politics hmanga inchei hausa hmasa ber an ni a, hausa pawh a ngah ber. Tun hnaia MNF an sorkar tak leh ZPM boruak a rawn invawrh san tak hnu hian an han insawi khawngaihthlak a, hei hi chu Congress politics khelh dan tur a ni lo. Tin, kum 20 chuang an sorkar chhunga dik tumna tak tak nei lo awmkhawmna Party a la nih avangin insawi dik tum lutuk pawh hi miin an pawm lo ang, Congress culture pangngai nen tlin khel se tling leh thei tur an ni, 2028 lam enin tunah insawh ngheh tum se a ṭha zawk.

Congress chu tha an la ngah a, an tlan chhiat viau tawh pawhin Vanapa Hall khat tlat Congress ruh em em hi kar tin an la kokhawm thei. Kalkhawm hi member ngai hlir niin an lawmna tawk flag an Vai suau suau a, voter an pung lo hi an ṭha loh chhan chu a ni, Congress member hrim hrim chu an la ngah. Congress hun laia contract thawk tawh, an fate sorkar hnaa thun tawh pawisa nei kalkhawm tur ngah ber party an ni a, Congress chu an hmel te pawh hi a ṭha a, a milian hmel deuh vuk a, tarmit dum nena hawi thei pawh a ngah ber lai hian khawngaihthlak tak anga awm tum buai lo se,Congress hi chu Congress culture nen politics khel zel se an tan a ṭha ber ang.

ZPM PHUR OVER:

Mizorama phur ber chu ZPM. ZPM hi party tea awm ṭhin an ni a, ZNP ni ṭhin te, PC ni ṭhin te an tam a, kum 40 dawn sorkar tawh lo an ni a, an boruak káng ve deuh avang hian an phur hle a ni.

ZPM hi Sorkar ve tak tak inring tawh an nia an sorkar theih pawh a rinawm ve ṭan a, tun hmaa boruak siama boruak a tham ral ang mai mai an nih chuan; an hotupa Pu Lalduhoma a chawlh phei chuan 2028 hi an tan a huphurhawm.

ZPM tan 2023 hi Golden Chance a ni a, MNF hi Chief Minister avang te, Minister hausa tak tak avang te, intiamna avang te, pawisa awm lo leh Kamrula te avang hian mi pangngai chin chuan an vote nawn tawh dâwn lo niin a lang. Congress chu Pu Zoramthanga sawi angin beih tham pawh an ni meuh lo tak tak ta si a, Congress tan 2023 ah chance a awm lo.

ZPM hi chance ṭha nei tih vanga khauphar thawven leh phur lutuk a ṭul lo, sorkar siam leh si lo hian an phur thlawn ve thei tlat. Tuna boruak angah hi chuan inthlang ila ZPM hi a sorkar mai a rinawm a, mahse inthlan hma hian hun leh ni a la tam a, ZPM hi phur leh lutuk suh se, nakinah an la tliak hnawp thei si a.

- Zothanmawia, Chhinga Veng